Kókshetaýda myltyq asynǵan er adam taksıge otyrmaqshy boldy

KÓKShETAÝ. QazAqparat - Kókshetaýda myltyq asynǵan er adam taksımen dámhanaǵa baryp, onda tanysymen ekeýara máseleni sheshpekshi bolǵan. Qaýipti jolaýshy týraly taksı júrgizýshisi birden polıtsııaǵa habar berdi, dep habarlaıdy QazAqparat tilshisi.

Aqmola oblystyq polıtsııa departamenti baspasóz qyzmetiniń málimetinshe, naýryzdyń 13-de Kókshetaý qalalyq polıtsııa basqarmasynyń patrýldik polıtsııa qyzmetkerleri taksı júrgizýshisiniń kómegimen qaskúnemdi izin sýytpaı ustady.

«Er adam mas jolaýshyny myltyqpen dámhanaǵa jetkizýden bas tartty. Ol birden qaýipti jolaýshy týraly kezekshi bólimge habarlady. Kýágerdiń aıtýynsha, qaskúnem telefon arqyly oblys ortalyǵyndaǵy oıyn-saýyq oryndarynyń birinde bolǵan tanysyna qoqan-loqy kórsetken», - dedi vedomstvodan.

Kúdikti Kókshetaý qalasynyń buryn sotty bolǵan 45 jastaǵy turǵyny ekeni anyqtaldy. Odan «Saıgak» markaly atys qarýy tárkilendi. Osyǵan baılanysty Qylmystyq kodekstiń 115 baby «qaýip» boıynsha sotqa deıingi is qozǵaldy. Sonymen birge, «Qamaýda ustaý» protsessýaldyq májbúrleý sharasy tańdaldy.

Tirtip saqshylary atap ótkendeı, «Quqyq tártibi» jedel aldyn alý sharasy aıasynda tyıym salynǵan zattardy zańsyz alyp júrgeni nemese saqtaǵany úshin 60 adam ustaldy. Olardyń beseýi atys qarýyn zańsyz satyp alǵany jáne alyp júrgeni úshin, 48-i sýyq qarýdy alyp júrgeni úshin sottaldy.

Eske sala keteıik, qylmysqa qarsy kúresti kúsheıtý, qoǵamdyq oryndarda quqyq buzýshylyqtardyń aldyn alý jáne jolyn kesý maqsatynda 12-18 naýryz aralyǵynda Aqmola oblysynda «Quqyq tártibi» jedel aldyn alý is-sharasy ótýde.