Kókshetaýda múmkindigi shekteýli jandardyń «Jańa tulǵalar» festıvali ótti
«Nur Otan» partııasynyń «Kedergisiz keleshek» jobasyn júzege asyrý sheńberinde qolǵa alynǵan festıvalge kórkem shyǵarmashylyq pen sporttyń toǵyzqumalaq, ústel tennısi jáne sýda júzýmen aınalysatyn 14 pen 35 jas aralyǵyndaǵy, І, ІІ, ІІІ toptaǵy múgedektigi bar múmkindigi shekteýli jandar qatysty.
«Býrabaı» sport saraıynda festıvaldiń ashylýy ótip, onda oblystyń Kókshetaý, Stepnogor qalalary men aýdandarynan kelgen qatysýshylar toǵyzqumalaq, ústel tennısi jáne sýda júzý sııaqty sporttyq saıystardan synǵa tústi.
Al, «Dostar» mádenıet saraıynda shyǵarmashylyqtaryn ortaǵa salyp, jandy tebirenter ánderimen, tamasha bılerimen kórermenderge kóterińki kóńil kúı syılady.
Qazylar alqasy vokal, ymmen án aıtý, horeografııa, kórkem sóz, aspapty jáne dekoratıvti-qoldanbaly shyǵarmashylyq atalymdary boıynsha jáne sporttyq saıystardan úzdikterdi anyqtady.
Sharaǵa Aqmola oblysynyń ákimi, «Nur Otan» partııasy oblystyq fılıalynyń tóraǵasy Ermek Marjyqpaev qatysyp, jeńimpazdardy marapattady.
Festıval oblystyń barlyq aýdandary men qalalarynan kelgen talanttar, Kókshetaý qalasyndaǵy medıtsınalyq – áleýmettik mekemesi men estý jáne sóıleý qabileti nashar balalarǵa arnalǵan №4 mektep ınternaty shákirtteriniń shyǵarmashylyq keshine ulasty.
«Sharany ótkizýdegi basty maqsat – shyǵarmashyl jastardyń bir-birimen aralasýyna jaǵdaı jasaý, sondaı-aq olardyń arasynan daryndylardy anyqtaý», – deıdi «Nur Otan» partııasy Aqmola oblystyq fılıalynyń baspasóz hatshysy Dınara Dúısenova.
Festıval qorytyndysy boıynsha úzdikter dıplom jáne aqshalaı syılyqpen marapattaldy. Al, festıvalge qatysqan barlyq ónerpazdarǵa arnaıy sertıfıkattar tabystaldy.
