Kókshetaýda mıgratsııalyq qyzmet ortalyǵy ashyldy
KÓKShETAÝ. QazAqparat - Kókshetaýda Digital HQO jáne mıgratsııalyq qyzmet ortalyǵy ashyldy, dep habarlaıdy QazAqparat tilshisi oblystyq ishki basqarmasyna silteme jasap.
Vedomstvonyń málimeti boıynsha, óńirde memlekettik qyzmetshilerdiń halyqqa memlekettik qyzmet kórsetýde tikeleı baılanysyn azaıtý boıynsha jumystar atqarylýda. Osy maqsatta Kókshetaýda memlekettik qyzmet operatordyń kómeginsiz kórsetiletin avtomattandyrylǵan tsıfrly HQO ashyldy. «Connection point» - bul klıentterdiń HQKO qyzmetkeriniń qyzmetin qoldanbaı, operatsııalyq zalda kezekti tospaı, HQKO bólimderinde óz betinshe elektrondyq qyzmetti ala alatyn ózine-ózi qyzmet kórsetý sektory. Munda qajetti anyqtamalar alýǵa bolady.
«Azamattarǵa arnalǵan úkimet» memlekettik korporatsııasy turǵyndardy elektrondy formatta qyzmet alýǵa úıretýge daıyn ekenin atap ótti. Ol úshin oqytatyn arnaıy synyp jumys isteıtin bolady. Onda kez kelgen adam elektrondy úkimet portalynda jumys isteýdi jáne memlekettik qyzmet alýdy úırenedi.
«Tsıfrly HQO-nyń ashylýy azamattarǵa óz betinshe elektrondy úkimet portaly arqyly qyzmet alýǵa múmkindik beredi. Bul turǵyndarǵa kórsetiletin memlekettik qyzmet sapasynyń artýyna oń áser etedi», dedi Aqmola oblysy ákiminiń orynbasary Qanat Ydyrysov.
