Kókshetaýda «Mereıli otbasy» baıqaýynyń oblystyq kezeńiniń jeńimpazdary anyqtaldy

KÓShETAÝ. QazAqparat - Kókshetaýda «Mereıli otbasy» ulttyq baıqaýynyń aqtyq kezeńinde Aqmola oblysynyń abyroıyn qorǵaıtyn otbasylar anyqtaldy, dep habarlaıdy «QazAqparat» HAA tilshisi.

Saltanatty sharaǵa oblystyq ishki saıasat basqarmasynyń basshysy Aına Mysyrálimova,  oblystyq ardagerler keńesiniń tóraǵasy Ǵosman Tóleǵul, analar keńesiniń tóraıymy Zere Qıyqova jáne «Shańyraq» qoǵamdyq birlestiginiń tóraǵasy Berik Raqyshev qatysyp, quttyqtaý sóz sóıledi.

Bul joly baıqaýǵa 14 aýdan men 2 qaladan 33 otbasy qatysýǵa ótinish bildiripti. Búgingi kúni oblysta 5 myńǵa jýyq kóp balaly otbasy bar. Sonymen birge, 8 myńnan astam kóp balaly ana tirkelgen, olardyń ishinde «Alqa alqa», «Kúmis alqa» ıgerleri bar. Oǵan qosa, Qaharman ana ataǵyna laıyq dep tanylǵan, І jáne ІІ dárejeli «Ana dańqy» ordenderimen marapattalǵandar da bar.

Bıylǵy  ulttyq baıqaýdyń oblystyq kezeńiniń qorytyndysy boıynsha Bulandy aýdanynan kelgen Qalıevter men Tselınograd aýdanynan kelgen Qýandyqovtar otbasylary jeńimpaz atanyp, olardyń árqaıysyna 250 myń teńge kóleminde aqshalaı sertıfıkattar men syılyqtar tapsyryldy. Sondaı-aq, ekinshi jáne úshinshi oryndarǵa zerendilik Baımaqanovtar men sandyqtaýlyq Hamzathanovtar  otbasy laıyq dep tanyldy.

Osylaısha, ulttyq baıqaýdyń bıylǵy respýblıkalyq kezeńinde oblys namysyn bulandylyq Qalıevter men tselınogradtyq Qýandyqovtar otbasylary qorǵaıtyn bolady.