Kókshetaýda mereke kezinde adasyp qalǵan 10 bala tabyldy
KÓKShETAÝ. QazAqparat - Kókshetaýda Naýryz meıramy kezinde kópshiliktiń arasynda adasyp qalǵan 10 bala aman-esen tabylyp, ata-anasyna tapsyryldy, dep habarlaıdy QazAqparat tilshisi Aqmola oblystyq PD baspasóz qyzmetine silteme jasap.
Vedomstvonyń málimeti boıynsha, Kókshetaý qalasynda sońǵy eki jyldan beri polıtsııanyń qazirgi zamanǵy 6 stantsıonarlyq beketi jumys isteıdi.
«Bul beketter quqyqbuzyshylyqty eskertý jáne aldyn alý úshin halyq, onyń ishinde jastar kóp jınalatyn qoǵamdyq oryndarda ornalasqan. Naqtyraq aıtsaq, Ortalyq bazar, Táýelsizdik alańy, jaqynda ataýy ózgergen Gorkıı kóshesi, Vasılkovskıı jáne Borovskoı shaǵyn aýdandaryndaǵy áleýmettik nysandarǵa erekshe kóńil bólingen. Turǵyndar birinshi kezekte osy stantsıonarlyq beketterge kómek surap júginedi», - deıdi vedomstvonyń baspasóz qyzmetindegiler.
Máselen, jaqynda atap ótilgen Naýryz meıramynda ortalyq alańda ornatylǵan «Modýl-1» statsıonarlyq bekette kezekshilik atqarǵan polıtsııa serjanty Nursultan Mahmetov kópshilik arasynda adasyp qalǵan 10 balany izdep tabýǵa kómektesti.
Vedomstvodan atap ótkendeı, qazirgi zamanǵa saı jabdyqtalǵan statsıonarlyq beket quqyqbuzýshylyqty eskertý jáne aldyn alýǵa ǵana kómektespeıdi. Jol-kólik oqıǵasy, tótenshe jaǵdaılar kezinde kómek kórsetýde de paıdasy zor. Aıtalyq, naýryzdyń 26-da Borovskoı shaǵyn aýdanyndaǵy turǵyn úıde bolǵan órt kezinde tártip saqshylary órt sóndirý tehnıkasy kelgenshe turǵyndardy jedel qaýipsiz jerge shyǵaryp úlgerdi.
Eske sala keteıik, jaqynda Kókshetaý qalasynda bolǵan órt kezinde SPCh-1 bóliminiń komandıri, azamattyq qorǵanys aǵa serjanty Nurjan Álimjanov terez arqyly páterdiń ishine kirip, 3 jáne 5 jastaǵy eki balany qutqarǵan edi.
