Kókshetaýda «Men qazaqpyn» megajobasynyń jeńimpazdary anyqtaldy
KÓKShETAÝ. QazAqparat - Kókshetaýda «Qazaqstan» ulttyq telearnasynyń «Men qazaqpyn» megajobasyna irikteý ótti, dep habarlaıdy "QazAqparat" HAA tilshisi.
Halyqtyń ánderin áýeletip, halyq kompozıtorlarynyń shyǵarmalaryn nasıhattaıtyn shara Sh.Qusaıynov atyndaǵy qazaq mýzykalyq drama teatrynda uıymdastyryldy. Oǵan Qazaqstan Jazýshylar odaǵynyń múshesi, aıtysker aqyn Qudaıberli Myrzabekov, Kókshetaý qalasyndaǵy Birjan sal kolledjiniń dırektory, dástúrli ánshi Saıan Muhamedııarov, Úkili Ybyraı atyndaǵy oblystyq fılarmonııanyń kontsertmeısteri, kúıshi Ábilserik Qamashev qazylyq etti. 
Joba qorytyndysyna saı «Úzdik aımaqtyq ánshi» atalymynyń jeńimpazy Kókshetaý qalasynyń abyroıyn aspandatqan, ánshi Baýyrjan Nurmuhanov atandy. «Úzdik aımaqtyq kúıshi» atalymynda da kókshetaýlyq Saıat Babaev kópshilikten daralandy. «Úzdik aımaqtyq termeshi» atalymyn aqkóldik Názıra Beısenova jeńip aldy.
Jeńimpazdar elordada ótetin televızııalyq baıqaýǵa Aqmola oblysynyń atynan qatysatyn bolady. Jobanyń oblystyq kezeńine barlyǵy 25 úmitker irikteldi. 
Aıta ketý kerek, Ulttyq arna efırinen atalmysh joba kórermenge aǵymdaǵy jyldyń 3 qyrkúıeginen bastap jol tartady.
