Kókshetaýda memlekettik kirister departamentiniń kóligi jaıaý júrginshini qaǵyp ketti

KÓKShETAÝ. QazAqparat - Kókshetaýda Aqmola oblysy boıynsha memlekettik kirister departamentiniń kóligi jasyl baǵdarsham janyp turǵan kezde joldan ótip bara jatqan jaıaý júrginshini basyp ketti, dep habarlaıdy QazAqparat tilshisi.

Departament ókilderiniń aıtýynsha, oqys oqıǵa 25 maýsym kúni Chkalov jáne Áýelbekov kósheleriniń qıylysynda bolǵan.

«Kólik jaıaý júrginshiler jolaǵynyń bir jaǵynan kele jatqan áıeldi jibergen. Oǵan qarama-qarsy jaqtan kele jatqan jaıaý júrginshini baıqamaı, qaǵyp ketken, sonyń saldarynan jábirlenýshiniń qolyna zaqym kelgen», - deıdi vedomstvo ókilderi.

Olardyń aıtýynsha, rýlde memlekettik qyzmetker emes, jaldamaly júrgizýshi bolǵan. Ol óz aıybyn moıyndap, jábirlenýshiniń emdelýine qarjylaı kómektesip jatyr. Jábirlenýshi júrgizýshige eshqandaı shaǵymy joq ekenin bildirgen.