Kókshetaýda maıly daqyldardy tereń óńdeý kesheni salynyp jatyr

ASTANA. KAZINFORM — Memleket basshysynyń AÓK-tegi qaıta óńdeý úlesin ulǵaıtý jónindegi tapsyrmalaryn júzege asyrý sheńberinde Kókshetaýda iri óndiristik-logıstıkalyq keshenniń qurylysy júrgizilip jatyr, dep habarlaıdy Úkimettiń baspasóz qyzmeti.

Joba aýyl sharýashylyǵy shıkizatyn tereń óńdeýge baǵyttalǵan, bul qosylǵan quny joǵary ónim shyǵarýdy qamtamasyz etedi.

«Sodrýjestvo» kompanııalar tobynyń bas dırektory Aleksandr Samoılovtyń aıtýynsha, nysannyń óndiristik qýaty jylyna 1 mln tonnaǵa deıin shıkizat (táýligine 3 myń tonna) óńdeýge múmkindik beredi. Keshen maıly daqyldardyń barlyq túrin óńdeıdi: kúnbaǵys, raps, zyǵyr jáne soıa.

— Bizdiń búkil jobamyz tereń óńdeý qaǵıdattaryna negizdelgen jáne agroónerkásiptik keshenniń eksporttyq áleýetin arttyrýǵa arnalǵan memlekettik baǵytpen tolyq sáıkes keledi, — dep atap ótti Aleksandr Samoılov.

Sonymen qatar, bıyl Memleket basshysynyń ındýstrııalyq jobalardy qoldaý jónindegi bastamalaryn júzege asyrý aıasynda Aqmola oblysynda jylyna 60 mln dana kirpish óndiretin kirpish zaýytynyń qurylysy júrgizilip jatyr.

«MM BRICK» JShS dırektory Esimhan Baıǵabylovtyń aıtýynsha, jobanyń quny — 13,7 mlrd teńge. Qazirgi ýaqytta qurylys-montaj jumystary 80%-ǵa aıaqtalyp, jabdyqtardy jetkizý bastaldy. Kásiporyndy iske qosý 2026 jylǵa josparlanǵan.

— Memlekettiń kómegimen sýmen jáne jylýmen jabdyqtaý jelilerin júrgizý máseleleri sheshildi. Qoldaý sharalarynyń búkil kesheni bizge ónimniń keń aýqymyn shyǵarýǵa jaǵdaı jasap, óńirdiń damýyna mýltıplıkatıvtik áser beredi, — dedi kásiporyn basshysy.

Osyǵan deıin Úkimet basshysy Aqmola oblysynyń ındýstrııalyq aımaǵynyń jobalarymen tanysqanyn jazǵan edik.