Kókshetaýda maı óńdeıtin zaýyt salynbaq

KÓKShETAÝ. QazAqparat - Kókshetaý qalasynda táýligine 1 myń tonna maı óńdeıtin zaýyt salý josparlanyp otyr, dep habarlaıdy QazAqparat tilshisi Aqmola oblysy ákiminiń orynbasary Marat Iǵalıge silteme jasap.

«Kókshetaý qalasynda maı óndiretin zaýyttyń qurylysy týraly májilis ótkizdim. «Kokshetau Oil» JShS basshysy Zınýlla Kazıev «táýliktik qýaty 1000 tonna bolatyn maı ekstraktsııalaý zaýytynyń» qurylysy jobasyn tanystyrdy. Jobanyń qýaty 11,8 mıllıard teńgege baǵalanyp otyr. Kásiporynnyń jyldyq qýaty - 125 myń tonna. 2020 jyldyń mamyr aıynda iske qosý josparlanyp otyr», - dep jazady M.Iǵalı áleýmettik jelidegi paraqshasynda .

Aıta keteıik, 2018 jyly Qazaqstan zyǵyr óndirý boıynsha dúnıejúzinde birinshi orynǵa (930 myń tonna) shyqty. Onyń ishinde eksportqa shyǵarylyp jatqan basym bóligi óńdelmegen.

«Biz aýyl sharýashylyǵy kesheni salasynda jumys isteıtin kásipkerlerge tıimdi baǵyt - aýyl sharýashylyǵy ónimderin óńdeýdi qolǵa alýdy usynamyz. Jaqynda úkimet bıznes, onyń ishinde qaıta óńdeý salasyn jeńildikpen qarjylandyrý úshin 600 mıllıard teńge bólýdi josparlap otyr», - deıdi M.Iǵalı.