Kókshetaýda maskúnem áıel kámeletke tolmaǵan balalaryn úıinen qýyp shyqqan
KÓKShETAÝ. QazAqparat - Kókshetaýda ishimdikke salynǵan kelinshek kámelettik jasqa tolmaǵan balalaryn úıinen qýyp shyqqan, dep habarlaıdy QazAqparat tilshisi.
Eske sala keteıik, aǵymdaǵy jyldyń 29 tamyzynda áleýmettik jelilerdiń birinde Kókshetaý qalasynyń «Kóktem» shaǵyn aýdany aýmaǵyndaǵy ornalasqan «Arıstrokat» meıramhanasynyń mańyndaǵy garajdyń artynda kámelettik jasqa tolmaǵan ul men qyz balanyń túnep júrgeni týraly vıdeo jaryq kórdi. Onda balalardyń ashyq aspan astynda jerge tóselgen matrasta jatqany kórsetilgen. Áleýmettik jeli qoldanýshylardyń biri balalardy osyǵan deıin de talaı ret dalada túnep júrgenin kórgenin aıtqan bolatyn.
Jergilikti polıtsııa qyzmetiniń málimeti boıynsha, balalardyń anasy 1986 jyly týǵan kelinshek araqqa salynyp ketken. Atalmysh otbasy 2016 jyldyń qarashasynan bastap, turmysy tómen otbasy retinde tirkelgen.
«Bul otbasynda tórt bala bar. Úlkenderi 13 jáne 10 jastaǵy qyzdar, odan keıingileri 8 jastaǵy ul men 1,3 jastaǵy búldirshin. Analary ishedi. Sol kúni anasy ishimdik iship balalaryna urysqan. Qoryqqan balalar úıinen qashyp shyqqan. Qazirgi kezde, balalardyń úsheýi jasóspirimderdi beıimdeý ortalyǵyna ornalastyryldy. Ortalyq mamandary olardyń shashtaryn qyrqyp, jýyndyrdy. Al eń kishileri oblystyq balalar aýrýhanasyna jatqyzyldy», dep túsindirdi polıtseıler.
Jaqynda ıývenaldy sot balalaryna qaramaǵan kelinshekke QR ÁQbK 127 baby boıynsha eskertý jasaǵan bolatyn. Alaıda, odan esh nátıje shyqpady. Qazirgi kezde, áıeldiń ata-ana quqyǵynan aıyrý boıynsha jumystar júrgizilýde.
Atalmysh otbasy Vasılkovka, 22 mekenjaıynda turady.
