Kókshetaýda latyn álipbıine kóshý máselesi talqylandy
Sharaǵa aýdandyq tilderdi oqytý ortalyqtarynyń dırektorlary, oqytýshylary men ádiskerleri, halyqty álipbıdiń jańa nusqasymen tanystyratyn mekemelerdiń qyzmetkerleri qatysty.
Qalalyq ishki saıasat basqarmasynyń basshysy Altynaı Ámirenova óz sózinde búgingi kúni qazaq álipbıiniń latyn álipbıine kóshýi jáne onyń naqty nusqasy boıynsha qaǵıdatty máseleler sheshilgen kezde, kún tártibinde aqparattyq - túsindirý jumystaryn uıymdastyrý jáne eresekterdi oqytýǵa daıyndyq boıynsha birqatar másele týyndaıtynyn aıtty. Muny Aqmola oblystyq oqý-ádistemelik ortalyǵynyń qyzmetkerleri de alǵa tartty.
«Qazaq álipbıin birtindep latyn qarpine kóshirý boıynsha qarqyndy jumys josparlanyp otyr. Jańa álipbıge birtindep kóshý 2023-2031 jyldarǵa josparlanǵan. Bul baǵyttaǵy jumystar latyn álipbıine kóshýdi túsindirý, ilgeriletý jáne engizý boıynsha tildik daıyndyq ortalyqtarynda jalǵasýda. «Tilálemi» jáne «Qazlatyn» saıttaryndaǵy jańalyqtar men jobalar árdaıym basty nazarda jáne áleýmettik jelilerde jarııalanady», - dep atap ótti ádisker Ásemgúl Qarsabaeva.
Qazaq álipbıiniń tarıhy boıynsha derekterdi usynǵan Sh.Ýálıhanov atyndaǵy Kókshetaý ýnıversıtetiniń fılologııa ǵylymdarynyń magıstri Laıs Mýsın álipbıdiń jańa grafıkasy men quramy, dybys – fonema araqatynasy, qazirgi dybys jáne emle normalary máselelerine egjeı-tegjeıli toqtaldy. Osyndaı is-sharalardyń nátıjesinde tyńdaýshylar eresek turǵyndardy latyn grafıkasyndaǵy qazaq álipbıine oqytý úshin óz bilimderin tolyqtyrýy tıis, dep esepteıdi uıymdastyrýshylar.
Іs-shara sońynda qatysýshylar jańa latyn grafıkasyn engizý baǵytynda júrgizilip jatqan jumystar týraly óz tájirıbelerimen bólisti.
