Kókshetaýda qyzdardy jezókshelikke májbúrlep kelgen kúdikti qolǵa tústi
KÓKShETAÝ. QazAqparat - Kókshetaýda adam saýdasymen aınalysqan jáne jas qyzdardy zańsyz bas bostandyǵynan aıyrǵan kúdikti qolǵa tústi, dep habarlaıdy QazAqparat tilshisi ІІD baspasóz qyzmetine silteme jasap.
«Qylmys «Toqta trafık» arnaıy jedel-aldyn alý sharasy kezinde anyqtaldy. Bıylǵy jyldyń maýsym aıynda ІІD Uıymdasqan qylmyspen kúres basqarmasynyń qyzmetkerleri Kókshetaý qalasynda adam saýdasyna qatysty birneshe ret qylmys jasaǵan er adamdy ustady. Kúdiktiden zardap shekkender jeńil júristi 22-30 jastaǵy boıjetkender.
Kúdiktini anyqtap, ustaý úshin keshendi sharalar qolǵa alyndy. Qazirgi kezde kúdiktiniń 7 qylmysqa qatysy bary anyqtaldy. Onyń ishinde 2 ret QR QK-niń 126-baby boıynsha (zańsyz bas bostandyǵynan aıyrý), 2 ret QR QK 194-babynyń 2-bóligi boıynsha (bopsalaý), 1 ret QR QK-niń 125-baby 3 bóligi boıynsha (adam urlaý), 1 ret QR QK-niń 308-baby 2 bóligi boıynsha (jezókshelikpen aınalysýǵa májbúrleý) jáne 1 ret QR QK 309-babynyń 2-bóligi boıynsha (jezókshelik jáne jeńgetaılyqpen aınalysý úshin qorda ustaý jáne uıymdastyrý) qylmys jasaǵan», -dep túsindirdi ІІD baspasóz qyzmetindegiler.
Polıtseılerdiń deregi boıynsha kúdikti qyzdarmen dámhanada tanysyp, keıin aldap jaldamaly páterine aparyp otyrǵan. Onda zardap shegýshilerge kúsh kórsetip, jezókshelikpen aınalysýǵa májbúrlegen. Sonymen qatar, kúdiktiniń jynystyq qyzmet kórsetetin qyzdardan birneshe aı boıy aqsha bopsalap kelgeni de anyqtaldy.
Qazirgi kezde kýágerlerden túsinikteme alynyp, kúdikti ýaqytsha ustaý oqshaýlaǵyshyna toǵytyldy.
