Kókshetaýda qutqarýshylar 19 jastaǵy jigitti ajal aýzynan alyp qaldy
KÓKShETAÝ. QazAqparat - Kókshetaýda qutqarýshylar sýǵa batyp bara jatqan 19 jastaǵy jigittiń ómirine arasha tústi, dep habarlaıdy QazAqparat tilshisi.
TJD baspasóz qyzmetiniń málimeti boıynsha, keleńsiz jaǵdaı oblys ortalyǵyndaǵy Qopa kólinde bolǵan. Osy kúni kezekshilikte bolǵan qutqarý bólimshesiniń qyzmetkerleri jaǵadan 90 metr qashyqtyqta sýǵa batyp bara jatqan adamdy baıqap qalǵan. Qutqarýshylar dereý kómekke umtylyp, er adamdy jaǵaǵa alyp shyqqan. Keıin belgili bolǵandaı 1998 jylǵy jigit sýǵa shomylý kezinde baıqamaı arnaıy belgilengen aýmaqtan asyp ketken. Alǵashynda óz erkimen jaǵaǵa qaıtýǵa tyrysady. Alaıda, áli quryǵan onyń áreketinen túk shyqpaı, sýǵa bata bastaıdy. Osy kezde, kómekke jetken qutqarýshylar ony jaǵa alyp shyǵady.
Osy kúni Kókshetaý qalalyq qutqarý bólimshesiniń medbıkesi Dámegúl Áljanova sýǵa shomylý kezinde túrli jaraqat alǵan eki qyzǵa da medıtsınalyq kómek kórsetti.
Jalpy, shomylý maýsymy bastalǵannan beri 231 adam qutqarylǵan. Onyń 52-si - jasóspirimder. Qutqarýshylar men medıtsına qyzmetkerleri 91 adamǵa túrli medıtsınalyq kómek kórsetti.
