Kókshetaýda qurylysshylardyń ústine kirpishter qulady
KÓKShETAÝ. QazAqparat - Kókshetaýda qurylys alańynda jumysshylardyń zardap shegýine baılanysty qylmystyq is qozǵaldy, dep habarlaıdy QazAqparat tilshisi.
Málim bolǵandaı, 3 qyrkúıek kúni Kókshetaý qalalyq Іshki ister basqarmasynyń kezekshilik bólimine jedel járdem qyzmetiniń felsheri habarlasqan. Onyń sózine qaraǵanda, oblys ortalyǵyndaǵy qurylys alańdarynyń birinde ústerine kirpish qulap ketken 1966 jáne 1982 jylǵy eki jumysshy túrli dene jaraqattarymen Aqmola oblystyq aýrýhanasyna túsken. Onyń ishinde 35 jastaǵy er adam jansaqtaý bólimine jatqyzylǵan.
Polıtseıler anyqtaǵandaı, zardap shegýshiler oblys ortalyǵynda turǵyn úı salyp jatqan jeke fırmada tas qalaýshy bolyp jumys isteıdi. 3 qyrkúıek kúni kirpishter salynǵan konstrýktsııany kóterý kezinde kirpishter shashylyp, ústerine qulaǵan.
«Olar qaýipsizdik tehnıkasy erejesi boıynsha kúndelikti ınstrýktajdan ótedi. Bastaryna kaska kıedi. Oǵan qosa, zardap shegýshilerge kirpish kóterý kezinde qaýipsiz aımaqqa baryp-turýǵa qatysty eskertý jasaldy. Alaıda, olar oǵan qulaq aspady», - dep aqtaldy jumys berýshi.
Jumysshylar eńbek kelisimshartyn jasaspaı, jaldanyp jumys istegeni belgili boldy.
Fırmanyń tehnıkalyq dırektory da qurylysshylardyń qaýipsizdik tehnıkasy erejesin saqtamaǵanyn aıtýda.
Qazirgi kezde birqatar saraptama taǵaıyndalyp, oqıǵanyń mán-jaıy anyqtalý ústinde.
Aıta keteıik, aǵymdaǵy jyly oblysta eńbekti qorǵaý erejesin buzý faktilerine qatysty QR QK-niń 156-baby boıynsha 11 qylmystyq is qozǵaldy.
