Kókshetaýda qurylysshy besinshi qabattan qulap ketti

KÓKShETAÝ. QazAqparat - Aqmola oblysynda eńbekti qorǵaý erejelerin buzý oqıǵasy boıynsha sotqa deıingi tergeý júrgizilip jatyr, dep habarlaıdy QazAqparat tilshisi oblystyq polıtsııa departamenti baspasóz qyzmetine silteme jasap.

Vedomstvonyń málimetinshe, 30 qarashada Kókshetaý qalasy polıtsııa basqarmasynyń kezekshi bólimine oblys ortalyǵynyń 34 jastaǵy turǵyny oblystyq aýrýhanaǵa jetkizilgeni týraly habar tústi.

«Er adam «jabyq mı jaraqaty, sol jaqtaǵy 6-shy qabyrǵanyń synýy» dıagnozymen aýrýhanaǵa tústi. Jedel-tergeý toby onyń 30 qarasha kúni jańadan salynyp jatqan kóp páterli turǵyn úıdiń 5-qabatynan qulaǵanyn anyqtady. Osy jaǵdaıǵa baılanysty Qylmystyq kodekstiń 156-shy babynyń 1-shi bóligi «eńbekti qorǵaý erejelerin buzý» boıynsha sotqa deıingi is júrgizý bastaldy. Tekserý júrgiziledi» - dedi vedomstvodan.