Kókshetaýda qurylysshy 5-qabattan qulap, mert boldy
KÓKShETAÝ. QazAqparat - Kókshetaýda qurylys jumystaryn júrgizip jatqan jumysshy 5-qabattan qulap, kóz jumdy, dep habarlaıdy QazAqparat tilshisi.
Kókshetaý qalasyndaǵy Vasılkovskıı shaǵynaýdanyndaǵy salynyp jatqan úılerdiń birinde 58 jastaǵy azamat 5-qabattan qulap, alǵan jaraqatynan kóz jumdy.
«Men ol jerde bolyp qaıttym. Jumysshylardyń qolynda eńbek sharttary joq. Qaýipsizdik tehnıkasy múldem saqtalmaǵan. Arnaıy kıimderi, kaskalary, saqtandyrý belbeýleri de joq. Ol jerde 4 adam jumys jasaǵan, alaıda quqyq qorǵaý organdary ókilderi men biz kelgen boıda olar jan-jaqqa qashyp úlgergen», - dep jaýap berdi Aqmola oblysynyń Eńbek ınspektsııasy jónindegi basqarmasynyń eńbekti qorǵaý jónindegi ınspektory Muratbek Júsipov QazAqparat tilshisine bergen jaýabynda.
Onyń aıtýynsha, JShS Astanada tirkelgen, al basshysy qazir Aqtaýda júr.
«Olar qaıǵyly jaǵdaı bolǵany týraly akti jazýlary kerek. Sondyqtan dál qazir jumys berýshi tarap izdestirilýde», - dedi M. Júsipov.
