Kókshetaýda quqyq qorǵaý qyzmetterin usynatyn ortalyq ashyldy

KÓKShETAÝ. QazAqparat-Kókshetaý qalasynda QR Táýelsizdik kúni merekesi qarsańynda Aqmola oblystyq prokýratýrasynyń ǵımaratynda quqyq qorǵaý qyzmetterin usynatyn ortalyq ashyldy, dep habarlaıdy QazAqparat tilshisi.

Nysannyń ashylýyna aımaq basshysy Málik Myrzalın, QR Bas prokýrorynyń orynbasary Marat Ahmetjanov jáne quqyq qorǵaý organdarynyń basshylary men ardagerleri qatysty.

 

Ortalyqtyń negizgi mindeti - shaǵymdardy jedel sheshý, azamattardyń quqyq qorǵaý jáne memlekettik organdarǵa degen senimin arttyrý, ákimshilik kedergiler men bıýrokratııany joıý. Ortalyqta ákimdik, quqyq qorǵaý organdary, probatsııa, ádilet, «Azamattar úshin úkimet» memlekettik korporatsııasynyń ókilderi, advokattar men medıatorlar qyzmet kórsetedi.

 

Sonymen qatar, ortalyqtyń kireberisinde retsepshn, qyzmet túri men kezek sanyn anyqtaıtyn arnaıy termınal, kútý zaly jáne klıentterdiń balalary oınaıtyn oryn da qarastyrylǵan.