Kókshetaýda qubyr jarylyp, 20 shaqty úı sýsyz otyr
KÓKShETAÝ. KAZINFORM - Kókshetaýda sý qubyry jarylyp, 20-ǵa jýyq úı sýdan ajyratyldy. Qazirgi kezde qalpyna keltirý jumysy júrgizilip jatyr.
Qalalyq ákimdikten málim etkendeı, apat Aqan seri, 172 mekenjaıynda ornalasqan «Tabys» dúkeni aýmaǵynda bolǵan.
Aldyn ala anyqtalǵandaı, tozyǵy jekten shoıyn qubyry jarylǵan. Apat ornynda qala ákimi Baýyrjan Ǵaısa júr.
«Apattyń saldarynan sý qubyry jelisi boıyndaǵy Aqan seri-Elemesov kóshesi d-300 mm, Aqan seri-Ǵabdýllın d-200, Aqan seri-Pýshkın d-50 mm qaqpa klapandary jabylyp, Aqan seri kóshesiniń Elemesov kóshesinen Pýshkın kóshesi aralyǵynda ornalasqan 20-ǵa jýyq kóppáterli turǵyn úı sýdan ajyratyldy. Apat ornynda «Kókshetaý sý arnasy» kommýnaldyq kásipornynyń mamandary qalpyna keltirý jumystaryn júrgizip jatyr. Jóndeý jumystaryna barlyǵy 5 adam men 5 tehnıka jumyldyrylǵan», - dep túsindirdi qalalyq ákimdikten.
Eske salaıyq, budan buryn Stepnogorde JEO apat bolyp, turǵyndar jylýsyz jáne elektr jaryǵynsyz qalǵan edi.
