Kókshetaýda Qostanaı oblysynyń kúni ótip jatyr

Shara aıasynda Aqmola oblystyq tarıhı-ólketaný murajaıynyń ekspozıtsııa ǵımaratynda Qostanaı oblystyq tarıhı-ólketaný murajaıy «Kókshetaý - Qazaqstannyń mádenı astanasy 2021» murajaıaralyq ınnovatsııalyq jobasy aıasynda kórme qorynan «Qut qonǵan Qostanaı» kórmesin usyndy.

«Qut qonǵan Qostanaı» kórmesi ekspozıtsııasyna kelýshiler Qostanaı oblysynyń mádenı jáne tarıhı muralarymen tanysa alady. Kórmede tas dáýiri, qola dáýiri men erte temir dáýirindegi biregeı arheologııalyq oljalar; qazaq jaýynger-batyrlarynyń saýyttary men qarýlary, ańshylyq qural-saımandar; zergerlik buıymdar, ulttyq kıimder men óńir etnosynyń turmystyq zattary tárizdi paıdaly qazbalardyń sırek kezdesetin úlgileri qoıylǵan.

Sonymen qatar murajaıdyń kórkemdik kollektsııasyndaǵy qazaqstandyq beıneleý óneriniń negizin qalaýshylar men jetekshi sheberlerdiń - A.Qasteev, N.Hlýdov, L.Leontev, J.Shardenov, H.Naýryzbaev, G.Baıannyń, sondaı- aq ataqty qostanaılyq sýretshiler men qoldanbaly sýretshiler - G.Sokov, N.Torshın, A.Shestakov, S.Lýgovoı, N.Halıfaeva, S.Shalýnova, S.Ishanov, A.Anqaýovtyń sırek kezdesetin týyndylary qoıylǵan.

«Búgin Eńseli Táýelsizdigimizdiń 30 jyldyǵy qarsańynda, Qazaqstannyń mádenı astanasy jospary aıasynda jer jánnáty atanǵan kıeli Kókshe topyraǵyna Qostanaı oblysynyń mádenıet oshaqtary kelip otyr. Ulttyq aspaptarymyzdyń syrly sazymen baýrap, halqymyzdyń ólmes murasy – án-jyr ónerin asqaqtatyp, kúmbirlegen kúılerin tógiltip, urpaqtan-urpaqqa jetkizip kele jatqan E.Ómirzaqov atyndaǵy Qostanaı oblystyq fılarmonııasy ujymyn búgin kókshe tórinde qarsy alǵanymyzǵa qýanyshtymyz! E.Ómirzaqov atyndaǵy Qostanaı oblystyq fılarmonııasy - óner jolynda qanshama óreli jastardyń shabytyn shyńdap, mádenıet pen órkenıettiń damýyna eleýli úles qosqan talantty dara tulǵalardy samǵatqan kıeli qara shańyraq. N.Moldahmetov atyndaǵy qazaq halyq aspaptar orkestrin álemdik mýzyka mádenıetiniń ozyq úlgileri men Qurmanǵazy, Táttimbet, Dáýletkereı, Dına syndy dáýletker kúıshi-kompozıtorlardyń ólmes muralaryn jańǵyrtyp, ulttyq ónerimizdi nasıhattap, damytýǵa óz úlesin qosyp, jas urpaqtyń rýhanı tárbıesine de basa nazar aýdaryp, qudiretti ónermen sýsyndatyp kele jatqan kásibı ujym retinde tanımyz», - dedi Aqmola oblysynyń mádenıet, arhıvter jáne qujattamalar basqarmasynyń basshysy Aıgúl Sábıtova.

Aıta ketsek, «Rýhanı qazyna» respýblıkalyq festıvaldiń uıymdastyrýshylar komıtetiniń sheshimimen bıylǵy jyly «Qazaqstannyń mádenı astanasy» mártebesin alǵan Kókshetaý qalasynda 2021 jyldyń 7 qazanda Qostanaı oblysynyń mádenı kúni depbelgilendi.

Atalmysh shara sheńberinde, búgin saǵat 17:00-de Aqmola oblysynyń Úkili Ybyraı atyndaǵy fılarmonııasynda «E.Ómirzaqov atyndaǵy Qostanaı oblystyq fılarmonııasy» KMQK N.Moldahmetov atyndaǵy qazaq ult aspaptar orkestri «Dýmandy Tobyl» merekelik kontsertin usynady.

Kontserttik baǵdarlamada qostanaılyq kompozıtorlar - QR eńbek sińirgen qaıratkeri K.Derıpsaldınniń, QR eńbek sińirgen mádenıet qyzmetkeri B.Sáýekenovtyń, orkestrdiń jańartylǵan repertýary - QR eńbek sińirgen qaıratkeri, dırıjer, kompozıtor A.Jaıymovtyń «Dýmandy Tobyl», «Otpan taý», «Áz Táýke» shyǵarmalary, sondaı-aq, QR eńbek sińirgen qaıratkeri E.Úsenovtyń «Shaqshaq Jánibek», «Ustaz Armany», «Araqaraǵaı, arman -aı» atty shyǵarmalary oryndalady.

Al saǵat 19:00-de Shahmet Qusaıynov atyndaǵy oblystyq qazaq mýzykalyq-drama teatrynda Arqalyq qazaq jas kórermender teatry «Máńgúrt» spektaklin usynady. Teatr repertýarynda qazaq ádebıeti klassıkasy men qazirgi zaman ádebıetiniń ozyq úlgileri negizinde qoıylǵan qoıylymdar bar. Solardyń qatarynda Táýelsizdiktiń 30 jyldyǵyna R.Otarbaev «Qarasha qazdar qaıtqanda» tarıhı dramasy, B.Rımovanyń ınstsenırovkasymen «Abaı - Áıgerim» lırıkalyq dramasy, Sh.Aıtmatov «Máńgúrt» qasiret, «Aq keme» psıhologııalyq dramalary, S.Ahmad «Kelinder kóterilisi» komedııalyq, ereksekterge jáne balalarǵa arnalǵan D.Isabekov «Shyǵys ertegisi», J.Áliken «Sıqyrly tereze», M.Júnisuly «Er Tóstik», Ó.Boranbaı «Qorqaq kójek» ertegileri bar.