Kókshetaýda kóshe jaryǵyna bólingen qarjydan 126 mln teńge artyq tólengen
ASTANA. KAZINFORM — Kókshetaýda kóshe jaryǵyn ornatýǵa arnalǵan joba boıynsha bıýdjet qarajaty negizsiz jumsalǵan. Qala prokýratýrasy taldaý barysynda joba qunynyń jasandy túrde kóterilgenin anyqtady.
Áńgime «Kókshetaý qalasynyń kóshelerin jaryqtandyrý» memlekettik-jekeshelik áriptestik jobasy týraly bolyp otyr.
Prokýratýranyń málimetinshe, joba aıasynda tartylǵan materıaldar men jabdyqtardyń qunyna tıisti ekonomıkalyq negizdeme jasalmaǵan.
Mysaly, kelisimshartta qýattylyǵy 120 Vt bolatyn bir shamnyń baǵasy 80 myń teńge dep kórsetilgen. Alaıda onyń naryqtaǵy quny shamamen 52 myń teńge bolǵan. Osylaısha, bıýdjet qarajatyn paıdalanýdyń tıimdiligi men negizdiligi qaǵıdalary buzylyp, joba quny 126 mln teńgege negizsiz kóterilgen.
Qadaǵalaý sharalarynyń nátıjesinde negizsiz tólengen 126 mln teńge memleket bıýdjetine óndirildi.
Eske salaıyq, buǵan deıin Qarjylyq monıtorıng agenttigi Soltústik Qazaqstan oblysy boıynsha departamenti Aıyrtaý aýdanyndaǵy qurylys kezinde bıýdjet qarajatyn jymqyrý deregi boıynsha tergep-tekserý júrgizip jatqanyn jazǵanbyz.
