Kókshetaýda kórsetiletin qyzmetterdiń jármeńkesi ótti
KÓKShETAÝ. QazAqparat - Kókshetaýda alǵash ret «Kórsetiletin memlekettik qyzmetterdiń jármeńkesi» ótti, dep habarlaıdy QazAqparat tilshisi.
Oǵan Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttiginiń Aqmola oblysy boıynsha departamenti men jergilikti atqarýshy organdary jáne «Azamattarǵa arnalǵan úkimet» memlekettik korporatsııasy» KEAQ-niń fılıaldary qatysty.
Aqmola oblystyq ishki sıasat basqarmasynyń málimetine qaraǵanda, jármeńkede azamattar eń talap etiletin memlekettik qyzmet kórsetý salalarynda, onyń ishinde - jer qatynastary, sáýlet jáne qala qurylysy, turǵyn úı-kommýnaldyq sharýashylyǵy, áleýmettik salasy, kóshi-qon qyzmeti, konsýltatıvti-ádistemelik boıynsha kómekter aldy.
Jármeńke qorytyndylary boıynsha memlekettik qyzmet alý úshin ótinish bergen azamattardyń sany shamamen 100 adamdy qurady. Elektrondyq túrde 40 memlekettik qyzmet kórsetildi.
Sondaı-aq, memlekettik qyzmet kórsetýin elektrondyq túrde tartýǵa keń aýqymdy aktsııa ótkizilip, elektrondyq úkimet veb-portal arqyly boıynsha memlekettik qyzmet túrin alý úshin azamattarǵa oqý kýrstary uıymdastyryldy.
Jármeńkede turǵyndardyń pikirleri eskerilip, aldaǵy ýaqytta odan ári jalǵastyrylatyn boldy.
