Kókshetaýda koronavırýstan kóz jumǵan adam qyzýy 41 gradýsqa kóterilgenshe dárigerge barmaǵan
KÓKShETAÝ. QazAqparat - Kókshetaýda koronavırýstan kóz jumǵan 68 jastaǵy áıel men 43 jastaǵy er adamnyń dıagnozdary belgili boldy. Bul týraly QazAqparat tilshisi Aqmola oblystyq taýarlar jáne kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmetine silteme jasap.
«1952 jylǵy áıel ókpesiniń ekijaqty qabynýy, lımfoadenopatııa, eksýdatıvti plevrıt belgilerimen kópbeıindi oblystyq aýrýhananyń ıntensıvti terapııa bólimshesine jetkizildi. Jaǵdaıy aýyr dep baǵalandy. Naýqas demikpege shaǵymdandy jáne ókpeni jasandy jeldetý apparatyna qosyldy.
Júrgizilgen PTR tekserý koronavırýstyq ınfektsııany anyqtady. Baqylaýdyń barlyq kezeńinde naýqasta teris dınamıka baıqaldy. Dárigerler júrgizgen reanımatsııalyq sharalar nátıje bermedi. 14 maýsymda naýqas kóz jumdy. Jedel járdem brıgada jeke qorǵaný quraldarymen jumys istedi», - deıdi vedomstvodan.
Sonymen qatar, Covid-19 koronavırýs ınfektsııasynyń aýyr aǵymy, ókpesiniń ekijaqty qabynýy jiti respıratorlyq dıstress-sındromnyń asqynýy dıagnozymen oblys ortalyǵynyń turǵyny 1977 jylǵy er adam kóz jumdy.
«Medıtsınalyq kómekke ýaqytyly júgingen kezinde, qaıǵyly jaǵdaı bolmas edi. Er adam 4 kún ózin-ózi emdegen. Dene qyzýy 41,3 gradýsqa kóterilgen kezde dárigerler qyzmetine júgingen, biraq ol nátıje bermedi. Ýyttaný sındromy men tynys alý jetkiliksizdiginiń aıasynda naýqastyń jaǵdaıy nasharlap, ol da 14 maýsymda kóz jumdy», - dep tolyqtyrdy vedomstvodan.
