Kókshetaýda koronavırýs juqtyrǵan júkti áıelderdiń sońǵysy jazylyp shyqty
KÓKShETAÝ. QazAqparat - Kókshetaý qalalyq kópbeıindi aýrýhanasynyń juqpaly aýrýlar stantsonarynan koronavırýspen aýyrǵan júkti áıelderdiń sońǵysy jazylyp shyqty, dep habarlaıdy QazAqparat tilshisi COVID-19 baspasóz ortalyǵyna silteme jasap.
Vedomstvonyń málimetinshe, áıel júktiliktiń 41 aptasynda qanaǵattanarlyq jaǵdaıda túsken. Taldaý onyń koronavırýsqa shaldyqqanyn rastady.
«Júkti áıel tamyzdyń 13-de tústi. Odan qaýipti derttiń belgileri baıqalmady. Áıel ishtegi sharananyń qımyly álsiz ekenin aıtty. ÝDZ men KTG keıin «sharananyń jaǵdaıy qaýipti» dıagnozy qoıyldy», - deıdi akýsher-gınekolog Sarjan Qalmuratov.
Dárigerler shuǵyl túrde kesar tiligin jasaý arqyly áıeldi bosandyryp alady. Sábıdiń densaýlyǵy jaqsy.
«Náresteni dárigerler birden anasynan oqshaýlap, baqylaýǵa aldy. Bizdiń neonatologtar táýlik boıy sábıdiń janynda boldy. Em alǵan ýaqytta anasy men sábıin baqylap otyrǵan akýsher Anna Sherengovskanyń eńbegin erekshe atap ótýge bolady», - dep tolyqtyrdy dáriger.
Arada alty táýlik ótken soń alynǵan qorytyndy taldaý ana men balanyń saý ekenin kórsetip, olar úıine jiberildi.
«Rengent zertteý kezinde bosanǵan áıeldiń ókpesi qabynǵany baıqalmady. Sol sebepti ol balasymen birge úıine shyǵaryldy», - dep tolyqtyrdy Qalmuratov.
Jalpy, Kókshetaý qalalyq kópbeıindi aýrýhanasynyń juqpaly aýrýlar stantsonary ashylǵannan beri munda 33 áıel (onyń 22-si kesar tiligi arqyly) bosanyp, 34 sábı dúnıege keldi.
