Kókshetaýda kópqabatty turǵyn úıdiń balkony opyrylyp tústi

KÓKShETAÝ. QazAqparat - Kókshetaýda kópqabatty turǵyn úıdiń balkony qulady. Balkonnyń beton plıtasy men kirpishteri úıdiń aldynda turǵan kóliktiń ústine tústi, dep habarlaıdy QazAqparat tilshisi.

Aqmola oblystyq TJD baspasóz qyzmetiniń máli metinshe, keleńsiz jaǵdaı búgin saǵat 14:42 oblys ortalyǵyndaǵy Kenesary kóshesi 25 mekenjaıy boıynsha ornalasqan 5 qabatty turǵyn úıde oryn aldy.

«Anyqtalǵandaı, kóppáterli turǵyn úıdiń eń joǵary 5 qabatyndaǵy páterdiń balkony qulaǵan. Oqıǵa ornyna TJD 3 tehnıkasy men 14 qyzmetkeri baryp, qulaǵan balkonnyń ornyndaǵy kirpish synyqtaryn tazalady. Zardap shekkender men mert bolǵandar joq», - dedi vedomstvodan.

Aıta keteıik, balkonnyń qulaǵany týraly áleýmettik jelide foto jáne beınejazba tarady. Onda balkonnyń beton plıtasy men kirpish synyqtary úıdiń aldynda turǵan kóliktiń ústine qulaǵanyn kórýge bolady.