Kókshetaýda kópqabatty turǵyn úıden órt shyǵyp, 35 adam evakýatsııalandy

KÓKShETAÝ. QazAqparat - Kókshetaýda kópqabatty turǵyn úıden órt shyǵyp, 35 adam evakýatsııalandy, onyń ishinde 14 bala bar, dep habarlaıdy QazAqparat tilshisi.

Oblystyq TJD baspasóz qyzmetiniń málimetinshe, bıylǵy jyldyń 26 qańtarda saǵat 22:10-da Kókshetaý qalasynyń «Tsentralnyı» shaǵynaýdanyndaǵy 5 qabatty turǵyn úıde órt shyqqandyǵy týraly qońyraý shalynǵan.

«Shaqyrý ornyna TJD jeke quramynan 20 adam jáne 4 arnaıy órt sóndirý tehnıkasy jumyldyryldy. Órt sóndirýshiler arnaıy baspaldaqtyń kómegimen 35 adamdy evakýatsııalady, onyń ishinde 14 bala bar», - dedi TJD baspasóz qyzmetinen.

Sonymen birge, Aqmola oblystyq PD baspasóz qyzmeti atap ótkendeı, qutqarý jumystaryna Kókshetaý qalalyq PB-nyń «Ásker-5», «Ásker-8» jáne «Jaıaý patrýl - 882» patrýldik polıtsııa batalonynyń qyzmetkerleri tartyldy. Olar páter ishinde qalǵan múmkindigi shekteýli turǵyndy syrtqa alyp shyqty.