Kókshetaýda Qopa kólinen balyq aýlaýǵa tyıym salyndy
ІІD baspasóz qyzmetiniń málimeti boıynsha sý qoımalarynda bıologııalyq melıoratsııalaý júrgizý jáne tabıǵatty qorǵaý polıtseıleri men jergilikti polıtsııa qyzmeti birlesip júrgizgen «Ýyldyryq» jedel aldyn alý sharasy kezinde Qopa kólinde zańsyz balyq aýlaý oqıǵasy tirkeldi.
«Tártip saqshylary balyqshylarǵa túsindirý jumystaryn júrgizdi. Qopa kólinde zańsyz qurylǵan qytaıda jasalǵan 2 sıntetıkalyq aýdy anyqtady. Birneshe saǵatqa sozylǵan reıd barysynda polıtseıler 12 QR ÁQbK 383 baby boıynsha ákimshilik hattama toltyrdy. Atalmysh sanktsııa boıynsha 10 AEK kóleminde aıyppul qarastyrylǵan. Qazirgi kezde Qopa kólinde 2018 jyldyń 16 mamyrynan bastap, 2020 jyldyń 16 mamyryna deıin 2 jyl boıy balyq aýlaǵa tıym salyndy», dep kórsetilgen habarlamada.
ІІD deregi boıynsha jyl basynan beri tabıǵatty qorǵaý polıtseıleri men jergilikti polıtsııa qyzmetkerleri QR ÁQbK 383 baby boıynsha 119 ákimshilik quqyq buzýshylyqty anyqtap, 1,5 mıllıon teńge kóleminde aıyppul saldy. Oǵan qosa, QR QK 335 baby boıynsha (balyq resýrstary, sý janýarlary jáne ósimdikterin zańsyz alý) qozǵalǵan 2 qylmystyq is tirkeldi.
Eske sala keteıik, jaqynda Qopa kóline Zerendi balyq pıtomnıginde ósirilgen 40 myń aq amýr jáne dóńmańdaı balyqtary jiberildi. Bul balyqtardyń erekshelegi, olar kóldiń astyndaǵy shópter men baldyrlardy jep kóldi tabıǵı jolmen tazartýǵa múmkindik beredi. Al ótken jyldyń qarasha aıynda 13 myńǵa jýyq aq amýr jáne 3 myńǵa tarta dóńmańdaı balyǵy jiberilgen bolatyn.
