Kókshetaýda Konstıtýtsııanyń 30 jyldyǵy keń kólemde toılandy
KÓKShETAÝ. KAZINFORM – Kókshetaýdaǵy jańa jaǵalaýda Qazaqstan Konstıtýtsııasynyń 30 jyldyǵyna arnalǵan saltanatty ári kópshilik qatysqan mereke ótti. Qalanyń ortalyǵy birliktiń, áýen men sporttyń aıryqsha alańyna aınaldy: Ulttyq ulannyń án jáne bı ansambli halyq áýenderin oryndap, kúnniń sharyqtaý sheginde «Tolaǵaı» atty áserli kúsh saıysy uıymdastyryldy.
Merekelik baǵdarlama aıasynda Aqmola oblysynda 500-den astam mádenı is-shara josparlanǵan. Kókshetaýdyń basty sahnasynda Ulttyq ulan orkestri men ansambli, mádenıet qaıratkerleri Jámıla Jarqynbaeva, Aıakóz Qalmaǵanbetova jáne Serikbolsyn Bekmoldın qatysqan úlken kontsert ótti. Eldik birlik pen otansúıgishtik rýhy turǵyndar men qonaqtardy biriktirdi.
Oblys ákimi Marat Ahmetjanov akmolalyqtardy Ata zańnyń mereıtoıymen quttyqtap, onyń el qalyptastyrýdaǵy mańyzyn atady.
– Konstıtýtsııa qabyldanǵannan bergi 30 jyl elimizdiń tarıhynda aıryqsha oryn alady. Bul kezeń eńbekter men jetistikterge, óz jolymyzdy izdeýge toly boldy. Prezıdentimiz birneshe ret atap ótkendeı, Konstıtýtsııa – memlekettik táýelsizdigimizdiń berik irgetasy ári eldiń qarqyndy damýynyń senimdi kepili. Búginde respýblıka jańartylǵan Konstıtýtsııa negizinde ómir súrip, memleket pen qoǵam arasyndaǵy senimge súıengen jańa saıası mádenıet qalyptasýda. Birlese eńbek etsek, damý qarqynyn údetip, halyqtyń ómir sapasyn arttyra alamyz dep senemin, - dedi Ahmetjanov.
Merekege kelgenderdiń arasynda Konstıtýtsııamen qurdastar da boldy. Kókshetaý turǵyny Balaýsa Jaqsybaı áserimen bólisti.
– Men 1995 jyly dúnıege keldim, sondyqtan bul mereke men úshin erekshe. Konstıtýtsııamen qatar ósip, eseıgenime qýanamyn. Óz býynymmen birge elimizdiń de kemeldengenin kórý – úlken qýanysh. Osyndaı merekeler adamdardy biriktirip, úlken tarıhtyń bólshegi ekenimizdi sezdiredi, - deıdi ol.
Keshke jaǵalaýda «Tolaǵaı» kúsh saıysynyń fınaly ótti. Eldiń ár óńirinen kelgen atletter bes batyrlyq synǵa tústi: 10 kelilik dop laqtyrýdan bastap, 50 kelilik qap kóterý men 200 keli júk artylǵan arbany súıreýge deıin. Jarys tartysty ótti, al jankúıerler sportshylardy ystyq yqylaspen qoldady.
Nátıjesinde birinshi oryndy Bekbol Nurlanov, ekinshi oryndy Roman Gavaznıýk, úshinshi oryndy Rýstam Zyndanov ıelendi. Jeńimpazdar Aqmola oblysynyń namysyn respýblıkalyq kezeńde qorǵaıtyn bolady.