Kókshetaýda kómir qory jetkilikti me

KÓKShETAÝ. KAZINFORM – Kókshetaýdaǵy «Kókshetaý jylý» kommýnaldyq kásipornynda eki aılyq qor, ıaǵnı 40,7 myń tonna kómir bar. 

Qala ákimdiginiń málimetinshe, qazirgi kezde óńirde jylytý maýsymy aldynda kómir jetkizý jumystary qyzý qolǵa alynǵan.

«Kókshetaýdaǵy «Kókshetaý jylý» kommýnaldyq kásipornynda ekiaılyq qor, 40,7 myń tonna kómir bar. Qazirgi kezde, qajettilik josparyna sáıkes kómir razrezderin ótinimdermen qamtamasyz etý boıynsha jumystar júrgizilip jatyr», - dep túsindirdi qalalyq ákimdiktiń baspasóz qyzmetinen.

Jalpy, Aqmola oblysy boıynsha aldaǵy jylytý maýsymyna jalpy 1 mln 378 myń tonna kómir qajet. Onyń 465 myń tonnasy kommýnaldyq-turmystyq qajettilikterge, 913,5 myń tonnasy turǵyndar úshin.

Búgingi tańda oblys ortalyǵynyń tuıyqtarynda 8 400 tonna kómir bar bolsa, onyń 2 400 tonnasy «Shubarkól» kómiri. Bul kómirdiń baǵasy – 18 100 - 18 200 teńge shamasynda satylyp jatyr. Buǵan qosa, 5 100 tonna «Qarajyra» jáne 900 tonna «Maıquba» kómiri bar. «Qarajyra» kómiriniń tonnasy 18 500 - 18 700, «Maıquba» kómiri 14 000 - 18 500 teńgeden.

Aıta ketsek, budan buryn Kókshetaýda jylytý maýsymy bastalǵanyn jazǵan edik.