Kókshetaýda kolledjge «mına qoıǵan» qaskúnem ustaldy
KÓKShETAÝ. QazAqparat - Aqmola oblysynyń polıtseıleri Kókshetaý qalasyndaǵy «Arna» kolledjine jarylǵysh zat qoıylǵany týraly jalǵan habar bergen adamdy bir saǵattyń ishinde anyqtady.
Bul týraly Aqmola oblystyq polıtsııa departamentiniń baspasóz qyzmetine silteme jasaǵan QazAqparat tilshisi habarlaıdy.
Vedomstvonyń málimetinshe, qońyraý 4 qańtar kúni saǵat 19:40-ta shalyndy.
«Oqıǵa ornyna jedel túrde barlyq kúsh qurylymdary, shuǵyl jáne arnaıy qyzmet ókilderi jiberildi. Іzdeý sharalary nátıje bermedi, jarylǵysh zat anyqtalǵan joq», - dep baıandady vedomstvodan.
Polıtsııa qońyraý shalǵan adamnyń esimin bir saǵatta anyqtady. Ol Kókshetaý qalasynyń buryn sottalmaǵan turǵyny bolyp shyqqan. Qońyraý shalǵanda ol mas bolǵan.
«Qazirgi kezde atalǵan fakti boıynsha QR QK 273-baby negizinde sot aldyndaǵy tergeý amaldary júrgizilýde, kúdikti azamat ustalyp, ýaqytsha ustaý oqshaýlaǵyshyna qamaldy», - dep qosty baspasóz qyzmeti.
Bul Kókshetaý qalasynda bes kún ishinde jarylǵysh zat týraly jasalǵan ekinshi habarlama. Birinshi ret qońyraý 30 jeltoqsan kúni saǵat 09:25-te soǵylǵan. Onda belgisiz bireý oblys ortalyǵynyń vokzalyna mına qoıylǵany týraly habarlaǵan. Keıin onyń Kókshetaý qalasynyń 40 jastaǵy turǵyny ekeni anyqtaldy.
«Turǵyndardyń esine salamyz, osyndaı áreketterdi jasaǵan adamdar QR QK 273-babyna sáıkes (lańkestik aktisi týraly kórineý jalǵan habar taratý) qylmystyq jaýapkershilikke tartylyp, materıaldyq shyǵyndy óteýmen birge alty jylǵa deıin bas bostandyǵynan aıyrý jazasy qarastyrylǵan», - dedi aımaq polıtseıleri.
Oksana Matasova
