Kókshetaýda kólik áıeldi qaǵyp óltirdi — oqıǵa vıdeoǵa túsip qalǵan
ASTANA. KAZINFORM — Kókshetaý qalasynyń Saryarqa shaǵyn aýdanyndaǵy aýlalardyń birinde adam ólimimen aıaqtalǵan jol-kólik oqıǵasy boldy, dep habarlaıdy Kazinform agenttiginiń tilshisi.
Áleýmettik jelilerde 9 mamyr kúni Kókshetaýdyń bir shaǵyn aýdanynda bolǵan jol-kólik oqıǵasy túsirilgen vıdeo tarady. Kadrdan kólik aýlaǵa kirip kele jatyp, jaıaý kele jatqan áıeldi qaǵyp, ústinen basyp ótkenin kórýge bolady. Odan keıin kólikten áıel júrgizýshi men jolaýshylar júgirip shyqqan.
Aqmola oblysy polıtsııa departamentiniń baspasóz qyzmeti habarlaǵandaı, jol-kólik oqıǵasy boıynsha qylmystyq is qozǵaldy.
— Oqıǵanyń mán-jaıyn anyqtaý úshin qajetti tergeý áreketteri júrgizilip jatyr, — dep málimdedi vedomstvo.
Oqıǵadan keıin Saryarqa shaǵyn aýdanynyń turǵyndary aýlaǵa kireberiske jasandy jol kedergisin (lejachıı polıtseıskıı) ornatýdy nemese jalǵyz kireberis tusqa shlagbaým qoıýdy, ne bolmasa ekinshi kireberis ashýdy surap beıneúndeý jasady.
Polıtsııa ókilderi óz jaýabynda Qazaqstan Respýblıkasy jol qozǵalysy erejeleriniń 17-bólimine sáıkes, turǵyn aımaqta jaıaý júrginshilerdiń trotýarmen de, joldyń júris bóligimen de júrýine ruqsat etiletinin túsindirdi. Turǵyn aımaqta jaıaý júrginshiler basymdyqqa ıe, alaıda olar kólik qozǵalysyna negizsiz kedergi keltirmeýi tıis.
Sondaı-aq polıtsııa aýla aýmaqtarynda kóliktiń tranzıttik (ótpeli) qozǵalysyna tyıym salynatynyn jáne turǵyndardyń ómiri men densaýlyǵyna qaýip tóndiretin kez kelgen áreketterge jol berilmeıtinin eske saldy.
— Jasandy jol kedergilerin, qosymsha jol belgilerin jáne qozǵalysty uıymdastyrýdyń basqa da elementterin ornatý máseleleri zańnamada belgilengen tártippen jergilikti atqarýshy organdarmen birlesip jáne qalanyń bas josparyn eskere otyryp sheshiledi, — dep tolyqtyrdy polıtsııa.
Eske salsaq, elordada 1,8 jasar búldirshindi kólik qaǵyp ketip, qaza tapqanyn jazdyq.
