Kókshetaýda kólik apatynan 25 jastaǵy júrgizýshi kóz jumdy
KÓKShETAÝ. QazAqparat – Kókshetaýda kommýnaldyq kásiporynnyń qoqys tazalaıtyn júk kóligin soqqan «Mazda» jeńil kóliginiń júrgizýshisi oqıǵa ornynda til tartpastan kóz jumdy, dep habarlaıdy QazAqparat tilshisi.
Aqmola oblystyq Polıtsııa departamenti baspasóz qyzmetiniń málimetinshe, jol-kólik oqıǵasy 14 aqpanda túngi ýaqytta oryn alǵan. Bul týraly saǵat 04:45-te Kókshetaý qalalyq polıtsııa basqarmasyna «112» dıspetcherinen habar tústi. Onda «Kenesary-Mamyr» kósheleriniń qılysynda jol-kólik oqıǵasy oryn alǵany aıtylǵan.
Anyqtalǵandaı, Mamyr kóshesiniń boıymen júrip kele jatqan oblys ortalyǵynyń 25 jastaǵy turǵyny basqarǵan «Mazda» avtokóligi belgilengen qashyqtyqty saqtamaı «Zıl» kóligine artynan soǵylǵan. Atalmysh «Kókshetazalyq» JShS-ne tıesili, ony 51 jastaǵy júrgizýshi basqarǵan.
«Jol apaty saldarynan «Mazda» avtokóliginiń 25 jastaǵy júrgizýshisi oqıǵa ornynda kóz jumdy. Qazirgi kezde osy oqıǵaǵa baılanysty Qylmystyq kodekstiń 345-babynyń 3-bóligi «jol qozǵalysy erejelerin buzý» boıynsha sotqa deıingi tergeý amaldary júrgizilýde. Sonymen birge, tıisti saraptama taǵaıyndaldy», - dedi vedomstvodan.
