Kókshetaýda qoqys shyǵarýǵa jańa tarıf ázirlenip jatyr

KÓKShETAÝ. QazAqparat – Kókshetaý qalasynyń turǵyndary qoqys toly baktarǵa jáne olardyń janynda jatqan qoqys úıindilerine burynnan úırenip qalǵan. «Kókshe Tazalyq» JShS kásiporynda qural-jabdyqtardyń isten shyǵýy jıi kezdesetinin, biraq eshteńe isteı almaıtynyn aıtady. Óıtkeni tarıf tym tómen, dep habarlaıdy QazAqparat tilshisi.

«Qoqys tasıtyn kólikterimiz isten shyqqan, sonyń kesirinen qoqysty shyǵaryp úlgermeı jatyrmyz. Qazir qoqys tasıtyn kólikter aqyryndap jóndelip jatyr. Ótken demalys kúnderi qoqys shyǵaratyn jeti kóliktiń ornyna bar-joǵy úsh-tórt-aq kólik jumys istedi. Sondyqtan demalys kúnderi qoqys shamadan tys tolyp ketti», - dep túsindirdi «Kókshe tazalyq» JShS abattandyrý bóliminiń basshysy Baınııaz Janııaz.

Onyń aıtýynsha, kompanııa kún saıyn jeti baǵytty jabýy tıis.

Ókinishke qaraı, oblys ortalyǵynda qoqys shyǵarý tarıfi óte az. Bir adamǵa – 151 teńge ǵana. Onyń ústine 2012 jyldan beri ol ózgermegen, al janar-jaǵarmaı men avtokólik bólshekteri aıtarlyqtaı ósti. «Kókshe tazalyq» JShS-nyń jıi isten shyǵatyn tehnıkasyn jańartýǵa múmkindigi joq.

Baınııaz Janııaz atap ótkendeı, halyqtyń qoqys shyǵarýǵa 54 mıllıon teńge qaryzy bar.

«Qazir tarıfti kóterý máselesi qarastyrylýda. Ázirge ol bekitilgen joq, biraq kútýdemiz. Múmkin qyrkúıekke deıin bekitilip qalar», - dedi ol.

Eger tarıf kóterilse, onda kásiporyn oblys ortalyǵyndaǵy qoqys shyǵarý jaǵdaıy jaqsarady dep úmittenedi.

Buǵan deıin Kókshetaý qalasynyń ákimi Baýyrjan Ǵaısa oblys ortalyǵynan qoqys shyǵarýǵa elordalyq kompanııa kómektesýge daıyn ekenin aıtqan bolatyn, biraq álgi kásiporyn mundaı arzan tarıfpen jumys istemeıtinin aıtypty.

«Búginde «Kókshe tazalyq» mekemesiniń tehnıkany jańartýǵa múmkindigi joq, ol únemi jetispeıdi. Bir kólik isten shyqsa, jeli tazalaýsyz qalady. Ekinshi kólik isten shyqsa, ekinshi jeli qalady. Biz Nur-Sultan qalasynyń kompanııasymen sóılestik, ol bizge kelýge daıyn, biraq kásiporyn bizdikindeı tarıfpen jumys istemeımiz dep otyr. Olar bizdiń kompanııalardyń áli jumys istep jatqanyna tańǵaldy. Qazir biz tarıfti ázirleý boıynsha konkýrs ótkizdik. Aldyn ala boljam boıynsha 400-500 teńge shamasynda. Sonda mundaı tarıfpen olar bizge jańa tehnıkamen, zamanaýı bólek konteınerlermen kelýge daıyn», – dedi Kókshetaý qalasynyń ákimi Baýyrjan Ǵaısa.