Kókshetaýda «Kókshe ónimderi» jobasy bastaý almaq
KÓKShETAÝ. QazAqparat - Kókshetaý qalasynda azyq-túlik baǵasyn turaqtandyrý maqsatynda aǵymdaǵy jyldyń 1 qarashasynan bastap, «Kókshe ónimderi» jobasy bastaý alady.
Bul týraly aımaq basshysy Málik Myrzalınniń qatysýymen ótken halyq kóp tutynatyn azyq-túlik taýarlarynyń baǵasyn turaqtandyrý jónindegi «Esil» áleýmettik kásipkerlik korporatsııasy» UQ» AQ usynǵan jobany talqylaýǵa arnalǵan májiliste aıtyldy, dep habarlaıdy QazAqparat tilshisi ákimdiktiń baspasóz qyzmetine silteme jasap.
Aımaq basshysy jurtshylyq kúndelikti tutynatyn azyq-túlik taýarlarynyń baǵasy aımaǵymyzda respýblıkalyq ortasha deńgeıden joǵary bolyp otyrǵandyǵyn aıta kele, saýda núktelerinde ózimizde shyǵarylatyn jergilikti azyq-túlik ónimderiniń úles salmaǵyn kóterý qajettigin atap ótti.
Osy oraıda, oblys ortalyǵynda azyq-túlik baǵasyn turaqtandyrý maqsatynda «Kókshetaý ónimderi» jobasyn júzege asyrý josparlanyp otyr. Bul týraly «Esil» ÁKK UQ» AQ basqarmasynyń tóraǵasy Qazybek Eskendirov aıtyp berdi. Onyń sózinshe, búgingi kúnge deıin oblys ortalyǵynyń 12 iri saýda oryndary jańa jobaǵa qatysýǵa kelisim berse, jýyq arada olardyń qatary 20-ǵa jetetin bolady. «Kókshetaý ónimderi» jobasyna qatysýshylardyń taýary saýda oryndaryna ústimizdegi jyldyń 1 qarashasynan bastap túsetin bolady.
«Jobany júzege asyrý úshin korporatsııa bir tıyn aqsha shyǵarmaıdy, bıýdjet qarjysy da jumsalmaıdy. Tek taýar óndirýshilermen jáne saýda oryndarynyń basshylarymen kelissózder júrgizý arqyly ózara tıimdi áreketke qol jetkiziledi. Korporatsııa «Kókshetaý ónimderi» jobasyna qatysýshylardyń tizimin jasap, bekitedi. Oǵan qatysýshy taýar óndirýshileri azyq-túlik ónimderin bólshek saýdadaǵy baǵadan 5 paıyzdan artyq emes baǵa boıynsha saýda oryndaryna jetkizip beredi. Al saýda oryndarynyń basshylary óz kezeginde sol baǵadan 5 paıyzdan artyq emes ústeme qosyp satýǵa mindettenedi», - dedi Qazybek Eskendirov.
Jobaǵa 13 ónimniń túrin shyǵaratyn 100 astam aýyl sharýashylyǵy taýarlaryn óndirýshiler qatysatyn bolady. Qazirdiń ózinde onyń 35 kelisimshart jasalynǵan.
Oblys basshysy ony áli de pysyqtap, baǵany turaqtandyrýǵa yqpal etetin bul jobany júzege asyrýdyń mańyzdylyǵyn atap ótti.
