Kókshetaýda qoǵamdyq kóliktiń jolaqysy qymbattady
KÓKShETAÝ. QazAqparat - Kókshetaý qalasynda búginen bastap qoǵamdyq kóliktiń jolaqysy qymbattady, dep habarlaıdy QazAqparat tilshisi.
2017 jyldyń 21 tamyzynan bastap, qoǵamdyq kóliktegi jol aqysy eresekter úshin 80 teńge, balalarǵa 40 teńge boldy. Sondaı-aq, qoǵamdyq kólikte aılyq júrý aqysy da ósip otyr.
Eske sala keteıik, Kókshetaýda 2014 jyldan beri qoǵamdyq kólikte jol júrý aqysy eresektege 60 teńge, balalarǵa 30 teńge bolyp belgilengen edi.
Jol júrý aqysyn kóterýge oblys ortalyǵyndaǵy avtoparkterdiń shyǵyndarynyń shamadan tys kóbeıip ketýi sebep bolyp otyrǵan kórinedi. Osy maqsatta tasymaldaýshy kompanııalar qala ákimdigine tarıfti kóterý týraly birneshe ret usynys jasaǵan. Bul usynys qalalyq máslıhattyń kezekti sessııasynda da qoldaý taýyp, búginen bastap, kúshine enip otyr.
