Kókshetaýda qoǵamdyq avtobýstarǵa kúnde dezınfektsııa jasalady
KÓKShETAÝ. QazAqparat - Kókshetaýda kúnde keshkisin qoǵamdyq avtobýstar dezınfektsııalanýda, dep habarlaıdy QazAqparat tilshisi.
Bul týraly koronovırýs ınfektsııasyna qarsy qabyldanǵan sharalarmen tanysqan BAQ ókilderine «Kókshetaý avtobýs parki» JShS-niń Ásııa Shárimova aıtty.
«Jahandy jalmaǵan koronavırýs ınfektsııasyna baılanysty elimizde tótenshe jaǵdaı jarııalanǵany belgili. Osyǵan oraı, bizdiń avtobýs parkinde de sanıtarlyq-epıdemıologııalyq sharalar qolǵa alynýda. Kúnde keshisin avtojýý beketterinde avtobýstar jýylady. Tazartý úshin arnaıy suıyqtyq pen hlor qoldanylady. Biz kúnine 10 lıtr arnaıy qospadan berip otyrmyz», - deıdi Ásııa Shárimova.
Sonymen qatar, ol avtobýs júrgizýshileri men kondýktorlary medıtsınalyq maskamen qamtylǵanyn atap ótti.
Mundaı profılaktıkalyq sharalar Kókshetaý áýejaıy men temirjol vokzalynda da júzege asyrylýda. Vokzal basshysy Roza Arystanqyzynyń aıtýynsha, stansaǵa táýligine on poıyz, 600 jýyq jolaýshy qatynaıdy. Ár poıyz aıaldaǵan kezde vokzalǵa túsken jolaýshylardyń qoly tıgen jerdiń barlyǵy sýrtiledi.
«Jolaýshylar ótken soń, vokzaldyń terezelerin ashyp, jeldetemiz. Vokzaldyń kiretin jáne shyǵa esiginde eki dezınfektsııalaý quraly dıspenser ornatylǵan. Qyzmetkerler maska sııaqty qorǵanyz quraldarymen qamtylǵan», - deıdi Roza Arystanqyzy.
