Kókshetaýda qoǵam belsendisi esirtki saqtady degen kúdikpen ustaldy
Aqmola oblystyq PD baspasóz qyzmeti 21 maýsymda Kókshetaý qalasynda esirtki zattaryn saqtady degen kúdikpen 1983 jyly týǵan jergilikti turǵynnyń ustalǵanyn rastady.
«Tintý kezinde ustalǵan adamnan aq tústi untaq tárizdi konsıstentsııasy bar polıetılen paket tabylyp, tárkilendi. Saraptama qorytyndysyna sáıkes bul zat - mefedron, ıaǵnı asa iri mólsherdegi esirtki quraly bolyp tabylady (jıyntyq kestege sáıkes). Osy derek boıynsha Qylmystyq kodekstiń 296-baby 4-bóligi boıynsha (ótkizý maqsatynsyz esirtki zatyn zańsyz qoldaný) sotqa deıingi tergeý bastaldy. Sol kúni ustalǵan adamǵa narkologııalyq tekserý jasaldy, ekspress-test nátıjesi zárinde kannabınoıd bar ekenin kórsetip berdi», - dedi vedomstvodan.
PD baspasóz qyzmetinen atap ótkendeı, Qylmystyq protsessýaldyq kodekstiń 201-babyna sáıkes ózge aqparat jarııalaýǵa jatpaıdy.
«Polıtsııa departamenti azamattar men BAQ ókilderinen shyndyqqa janaspaıtyn aqparat taratpaýdy jáne resmı derekkózderge senýdi suraıdy», - dep qosty vedomstvodan.
Osy rette áleýmettik jelidegi jergilikti pablıkter ustalǵan adamnyń Kókshetaý qalasynyń turǵyny, qoǵam belsendisi 40 jastaǵy Málik Ahmetqalıev ekenin jazyp jatyr.
Aıta ketsek, budan buryn Kókshetaýda esirtki tasymaldaǵan astana turǵyny 11 jylǵa sottalǵanyn jazǵan edik.