Kókshetaýda kiltin joǵaltqan mas adam úıine shatyr arqyly kirmek boldy

ASTANA. KAZINFORM — Kókshetaý qalalyq polıtsııa basqarmasyna túsken dabylǵa der kezinde jetken tártip saqshysy er adamnyń ómirin saqtap qaldy, dep habarlaıdy Polisia.kz.

Kókshetaý qalasynyń polıtsııa basqarmasyna ıÝbıleınyı kóshesindegi úıdiń tóbesinde er adamnyń sekirmek bolyp turǵany týraly habarlama tústi. Shaqyrýǵa jedel jetken «Ásker-3» avtopatrýliniń marshrýtyna bekitilgen patrýldik polıtsııa batalonynyń aǵa ınspektory Azamat Albaqov dereý áreket etti.

Ol shatyrǵa kóterilip, sońǵy sátte er adamdy ustap qalyp, qaıǵyly jaǵdaıdyń aldyn aldy.

Keıin anyqtalǵandaı, er adam mas bolǵan.

Onyń sózinshe, ol páteriniń kiltin joǵaltyp alǵandyqtan, besinshi qabattaǵy úıine shatyr arqyly túsýge árekettengen. Buǵan deıin de osyndaı tásildi qoldanyp kórgenin málimdedi.

— Osyndaı shaqyrtýlar kezinde bir ǵana oı — eń bastysy adamdy qutqarý, — dedi Azamat Albaqov.

Onyń aıtýynsha, mundaı sátterde adamnyń taǵdyry tártip saqshysynyń áreketine tikeleı baılanysty bolýy múmkin.

Oqıǵadan keıin er adammen profılaktıkalyq áńgime júrgizilip, ol ýchaskelik ınspektorǵa tapsyryldy. Polıtsııa qyzmetkerleri turǵyn úıge mundaı jolmen kirýdiń asa qaýipti ári zańǵa qaıshy ekenin eskertti. Eger kilt joǵalǵan jaǵdaıda, azamattarǵa esikti qaýipsiz ári zańdy túrde ashýǵa kómektesetin arnaıy qyzmetterge júginý usynylady.

Budan buryn Kókshetaýda jartylaı marafonnan keıin áıel kóz jumǵanyn jazǵan edik.