Kókshetaýda klıentiniń kóligin urlaǵan jumysshy ustaldy
KÓKShETAÝ. QazAqparat - Kókshetaýda tehnıkalyq qyzmet kórsetý stansasy klıentiniń kóligin urlaǵan kúdikti ustaldy, dep habarlaıdy QazAqparat tilshisi Aqmola oblystyq PD baspasóz qyzmetine silteme jasap.
Vedomstvonyń málimetinshe, Kókshetaý qalalyq Polıtsııa basqarmasynyń «102» arnaıy jelisine oblys ortalyǵynyń turǵyny, 40 jastaǵy áıel aryzdanǵan. Áıeldiń sózinshe, túngi ýaqytta belgisiz bireýler onyń qyzmet kórsetý stansasyna qaldyrǵan «Hıýndaı Elantra» kóligin aıdap ketken.
«Osyǵan baılanysty QR QK 200 babynyń 1 bóligi boıynsha qylmystyq is qozǵaldy. Oqıǵa ornyna jetken tártip saqshylary kólikti atalmysh tehnıkalyq qyzmet kórsetý stansasynyń jumysshysy urlaǵanyn anyqtady. Jedel-izdestirý sharasy kezinde «Ásker-4» ekıpajnyń qyzmetkerleri kúdiktini Kókshetaý qalasynyń Abaı kóshesi boıynda urlaǵan kólikte ustady», - dedi vedomstvodan.
Anyqtalǵandaı, 36 jastaǵy kúdikti qolǵa túsken kezde alkogoldik masań kúıde bolǵan.
«Urlanǵan kólik ıesine qaıtaryldy. Kúdiktige qatysty «Shaqyrǵanda kelip otyrý» protsessýaldyq mindetteý sharasy qoldanyldy», - dep tolyqtyrdy vedomstvodan.
