Kókshetaýda klıentin uryp óltirgen dámhana ıesi sottaldy
Qaıǵyly oqıǵa 2020 jyldyń 25 aqpanynda Kókshetaý qalasynda boldy. Іs materıaldarynda kórsetilgendeı, dámhana ıesi men kelýshi arasynda janjal týyndap, sońy tóbeleske ulasty. Dámhana ıesi kelýshini qoımaǵa aparyp, uryp-soǵady.
Zardap shekken adamnyń denesinde sarapshylar kóptegen jaraqatty anyqtaǵan, sonyń ishinde segiz qabyrǵa synǵan, baýyr ezilip ketken.
Alaıda, buǵan deıin dámhana ıesi qońyraý shalǵan jábirlenýshiniń áıeline kúıeýi mas ekenin aıtyp, alyp ketýdi talap etken. Dámhanaǵa kelgen anasy ulynyń ońbaı soqqyǵa jyǵylǵanyn anyqtady. Oǵan jábirlenýshini kólikke otyrǵyzýǵa kómektesti, tek úıine jete beriste anasy ulynyń jantásilim etkenin baıqady. Keıin adam óltirgenin bilgen dámhanasy ıesi polıtsııadan Nur-Sultan qalasyna qashyp ketti.
Sottalýshy sot otyrysy barysynda óz kinásin moıyndamady. Onyń aıtýynsha, jábirlenýshi baspaldaqtan qulaǵan kezinde jaraqat alǵan. Alaıda sarapshylar munymen kelispedi. Іs boıynsha júrgizilgen resmı saraptama kórsetkendeı, mundaı jaraqatty adam satydan qulaǵan kezde almaıdy.
Kókshetaý qalalyq sotynyń sýdıasy Dıdar Baınııazov er adamdy Qylmystyq kodekstiń 106-baby 3-bóligi «abaısyzda adam ólimine ákep soqqan densaýlyqqa qasaqana aýyr zııan keltirý» boıynsha kináli dep tanyp, jas balasyn eskere otyryp, er adamdy ortasha qaýipsiz qylmystyq atqarý júıesi mekemesinde óteı otyryp, segiz jyl bas bostandyǵynan aıyrý túrindegi jaza taǵaıyndady.
Zardap shegýshi marqumnyń anasy men áıeliniń paıdasyna sottalǵan adamnan moraldyq shyǵynnyń ótemi retinde 5 mıllıon teńge, materıaldyq zalal - 1 mıllıon 505 myń teńge, advokatqa tóleý shyǵyny – 1 mıllıon 350 myń teńge jáne ókilge aqy tóleý boıynsha 200 myń teńge óndirilip alyndy. Jalpy, sottalýshy 13 mıllıon teńgeden astam qarjy tóleýi tıis.
Sot úkimi zańdy kúshine engen joq.