Kókshetaýda qyzdar arasyndaǵy janjal eki ákimshilik bap boıynsha is qozǵaýmen aıaqtaldy
ASTANA. KAZINFORM — Jaqyn mańdaǵy úılerdiń turǵyndary janjal kezinde shyqqan shýdy estip, oqıǵany vıdeoǵa túsirgen. Keıinnen olar polıtsııa shaqyrǵan, dep habarlaıdy Kazinform tilshisi.
Aqmola oblysy polıtsııa departamentiniń baspasóz qyzmeti málim etkendeı, Kókshetaýda alkogoldik ishimdik ishken eki qyz arasyndaǵy janjal olardyń QR ÁQBtK-niń eki baby boıynsha ákimshilik jaýapkershilikke tartylýymen aıaqtalǵan.
— Oqıǵa 30 tamyzda bolǵan. Aldyn ala málimet boıynsha, qyzdar oıyn-saýyq oryndarynyń birinen shyqqan. Jol boıynda kólikte kele jatqan kezde olardyń arasynda aýyzsha janjal týyndaǵan. Kólikten shyqqannan keıin sózben bastalǵan daý tóbeleske ulasqan. Shýdy estigen jaqyn mańdaǵy úılerdiń turǵyndary polıtsııa shaqyrǵan, — dep habarlady vedomstvo.
Oqıǵa ornyna kelgen polıtsııa qyzmetkerleri janjalǵa qatysýshylardyń jeke basyn anyqtady. Eki áıelge de tynyshtyqty buzǵany, sondaı-aq qoǵamdyq orynda alkogoldik ishimdik iship, mas kúıde bolǵany úshin ákimshilik hattamalar toltyryldy.
Eske salaıyq, buǵan deıin Astana qalasynyń qylmystyq ister jónindegi aýdanaralyq soty tóbeles kezinde adam ólimine ákep soqqan is boıynsha eki adamǵa úkim shyǵarǵanyn jazǵan bolatynbyz.
