Kókshetaýda keıbir turǵyn úılerdiń jylýsyz otyrý sebepteri túsindirildi
KÓKShETAÝ. QazAqparat – «Kókshetaý jylý» kommýnaldyq kásipornynyń bas ınjeneri Danııar Aqybaev pen jedel basqarý qyzmetiniń basshysy Valerıı Mengýlov jýrnalısterge Kókshetaý qalasynda keıbir turǵyn úılerdiń jylýsyz otyrý sebepterin túsindirdi, dep habarlaıdy QazAqparat tilshisi.
«Kókshetaý jylý» kommýnaldyq kásipornynyń ókilderi oblys ortalyǵynda turǵyn úılerdi jylýmen qamtamasyz etýdi retke keltirý jumystary júrgizilip jatqandyǵy jáne bul jumystar bir aptaǵa sozylatynyn aıtty. Sol sebepti, olar turǵyndardy shydamdylyq tanytýǵa shaqyrdy.
«Kókshetaý qalasyna jylý ýaqtyly berildi, biraq qazirgi ýaqytta keıbir úılerge áli jylý jetken joq. Jetkenniń ózinde ystyq sýdyń qysymy men temperatýrasy tómen. Bul máseleni eskere otyryp jóndeý jumystary júrgizilýde. Jylý júıesin tolyq iske qosý jumystary kem degende 10 kúnge sozylady. Osyǵan baılanysty turǵyndarǵa sál shydamdylyq tanytýǵa shaqyramyz», - dedi D.Aqybaev.
Kommýnaldyq kásiporyn ókilderiniń aıtýynsha, búgingi kúni oblys ortalyǵynda barlyq mektepter, balabaqshalar men medıtsına mekemeleri jylýǵa qosylǵan. Sonymen birge, 912 turǵyn úıdiń 897-ne jylý berilgen. Kópqabatty 6 úıde esepke alý aspaptary joq, 9 úıdiń jertólesinen aqaý shyqty, bul úıler ıesiz jáne eshkimge kerek emes.
«Qurylys normasy men erejesi bar. Sondaı – aq, ár óńirde belgili bir jylytý kúnderi bekitilgen. Máselen, bizde 228 jylytý kúni bolsa, ońtústikte – 214. Eger biz 28 qyrkúıekte jylý bere bastasaq, onda 30 sáýirde aıaqtaýymyz kerek. Al, bizdiń óńirge bul tıimsiz», - dep túsindirdi D.Aqybaev.
Sonymen birge, jedel basqarý qyzmetiniń basshysy Valerıı Mengýlov áli kúnge deıin jylýsyz otyrǵan Saryarqa shaǵynaýdanyndaǵy jaǵdaıdyń sebebin túsindirdi.
«Saryarqa avtomattandyrylǵan jylý pýnktteri ornatylǵan jańa shaǵynaýdan. Mundaǵy sensorlar, sorǵylar men klapandarǵa qyzmet kórsetetin arnaıy bilimi bar maman bolýy kerek. Áleýmettik nysandardy biz baqylap, qyzmet kórsetsek, turǵyn úıler qaraıtyn páter ıeleri kooperatıvterinde mamandar jetispeıdi. Budan bólek, Saryarqa 6/2 jáne 14/3 esepteý meken-jaıy boıynsha ornalasqan turǵyn úılerde jylý aspaptary joq. Páter ıeleri kooperatıvterinde mamandar joq bolǵandyqtan sál kútýge týra keledi. Múlik ıeleri birlestigi quryldy, biraq ondaǵylar da jabdyqtardy túsinbeıdi. Biz, árıne, kómektesemiz, biraq bul budan ári jalǵasa bermeýi tıis. Eger ózderi túsinbese, IT-mamandardy jaldasyn, olar barlyǵyn baptap, iske qosyp beredi», - dep túsindirdi V.Mengýlov.
