Kókshetaýda QAJK-niń 12 qyzmetkerine qatysty is qaıta qaralyp jatyr
ASTANA. KAZINFORM – Kókshetaýda Qylmystyq-atqarý júıesi komıtetiniń (QAJK) 12 qyzmetkerine qatysty qylmystyq is qaıta qaralyp jatyr.
Aqmola oblystyq sotynyń málimetinshe, arnaıy mamandandyrylǵan sot óndirisinde QAJK qyzmetkerlerine qatysty is qaıta qaralyp jatyr. Buǵan deıin olar alqabıler sheshimimen eki ret aqtalǵan.
Bastapqyda aıyptalýshylarǵa Qylmystyq kodekstiń 146-baby 3-bóligi 1-tarmaǵy boıynsha – qatygez, adamdyq qadir-qasıetti qorlaıtyn qarym-qatynas jáne azaptaý deregi boıynsha aıyp taǵylǵan. Alaıda sot talqylaýy barysynda memlekettik aıyptaýshy jańa aıyp usyndy.
Endi aıyptalýshylarǵa Qylmystyq kodekstiń 362-baby 4-bóligi 1 jáne 2-tarmaqtary – qyzmettik ókilettikterin asyra paıdalaný boıynsha aıyp taǵylyp otyr.
Sot jańa aıyptaý aktisin tabystaý úshin 2026 jylǵy 4 mamyrǵa deıin úzilis jarııalady.
– Jańa aıyptaý aktisi jarııalanǵannan keıin aıyptalýshy J. belgisiz zatpen qolynyń bilezik tusyna jeńil jaraqat saldy. Oǵan alǵashqy medıtsınalyq kómek kórsetildi. Dáriger teksergennen keıin ol úıine jiberildi. Onyń densaýlyǵyna qaýip joq, – dep habarlady sottyń baspasóz qyzmeti.
Aıta keteıik, bul is 2023 jyly áleýmettik jelilerde Atbasar aýdanyndaǵy №1 túzetý mekemesinde sottalǵan azamattyń soqqyǵa jyǵylǵany týraly vıdeo taraǵannan keıin qozǵalǵan.
Tekserý nátıjesinde QAJK júıesindegi birqatar laýazymdy tulǵalar qyzmetinen bosatylǵan.
2025 jyly atalǵan is boıynsha 12 qyzmetker alqabıler sheshimimen aqtalǵan bolatyn. Alaıda prokýratýra bul úkimge narazylyq bildirip, sot sheshimi protsessýaldyq zańbuzýshylyqtarǵa baılanysty birneshe ret kúshin joıǵan.
