Kókshetaýda Qazaqstan-Reseı óńiraralyq yntymaqtastyǵy forýmyna daıyndyq júrgizilýde
Aqmola oblysy ortalyǵynyń 2019 jylǵy áleýmettik-ekonomıkalyq damýynyń qorytyndysy týraly baıandaǵan qala basshysy ónerkásip sektorynda 94,5 mıllıard teńgeniń ónimi óndirilgenin, onyń ishinde «KamAZ-Injınırıng» aktsıonerlik qoǵamynda, «Asyl-Arman», «ENKI», «Aqsaı nan Kókshetaý» nan-toqash kombınaty» men «Regıonstroı» seriktestikterinde óndiris kóleminiń turaqty ósimi qamtamasyz etilgenin atap ótti.
«Aýyl sharýashylyǵynda óndirilgen ónim kólemi 5,1 mıllıard teńgeni qurady. Negizgi kapıtalǵa tartylǵan ınvestıtsııa kólemi 36,4 mıllıard teńge deńgeıinde. Bul kórsetkish jyl qorytyndysynyń boljamy boıynsha 41,2 mıllıard teńgeni quramaq. Qurylys jumysynyń kólemi 19,1 mıllıard teńgeni qurady. Esepti kezeńde 164,7 myń sharshy metr turǵyn úı paıdalanýǵa berildi», - dedi A.Smaılov.
Sonymen qatar, qala ákimi atap ótkendeı, ekonomıkanyń naqty sektorynda 2062 jańa jumys orny ashyldy. Jumyspen qamtý qyzmetiniń yqpalymen 2298 adam eńbekke ornalastyryldy. Onyń 1861-i turaqty jumys isteıdi. «Eńbek» baǵdarlamasy aıasynda 305 adam oqýǵa jiberildi. «Jappaı kásipkerlikti damytý» baǵyty aıasynda 61 adam shaǵyn nesıe aldy. Jańa bıznes-ıdeıany júzege asyrý úshin 75 grant berildi. Úshinshi baǵyt aıasynda áleýmettik jumys ornyna 78 adam, jastar tájirıbesine 142 adam, qoǵamdyq jumysqa 217 adam jiberildi.
«Qalanyń Petropavl baǵytynda kommýnıkatsııa júıesi salynýda. Bıylǵy jyly 2,5 shaqyrym jylý qubyry tartylady», - dep túıindedi A.Smaılov.
Sondaı-aq brıfıng barysynda qala basshysy Kókshetaý qalasynda bıyl ótetin Qazaqstan men Reseı óńiraralyq yntymaqtastyǵynyń 17-shi forýmyna daıyndyq jumystary júrgizilip jatqanyn atap ótti.
Forým sheńberinde Kókshetaýda Oqýshylar saraıy salynatyny josparlanǵan. 1300 balaǵa arnalǵan ǵımarat eki korpýstan turady. Sonymen qatar, Qopa kóli men Qylshaqty ózenin tazartý jumystary qolǵa alynbaq.
Aıta ketsek, eki el arasyndaǵy yntymaqtastyqtyń 16-forýmy 2019 jyldyń qarashasynda Reseıdiń Omby qalasynda ótken bolatyn.
Onda Qazaqstan Prezıdenti Qasym-Jomart Toqaev kelesi forýmdy Kókshetaý qalasynda ótkizýdi usyndy.
«Eki eldiń ózara is-qımylynyń mańyzdy baǵyttarynyń biri - ekologııa jáne sol salamen baılanysty máseleler. Ekologııalyq problemalar, ózderińiz biletindeı, memlekettik shekaraǵa qaramaıdy. Biz ekologııa máselesin birige sheshýimiz kerek. Sondyqtan men kelesi forýmnyń taqyrybyn «Ekologııa jáne jasyl ósim salasyndaǵy yntymaqtastyq» dep belgilep, ony 2020 jyly Kókshetaý qalasynda ótkizýdi usynamyn», - dedi Memleket basshysy.
Forým Qazaqstan men Reseı qalalarynda 2003 jyldan beri turaqty túrde ótkizilip keledi.
