Kókshetaýda «Qazaq dalasy - uly túrki eliniń qara shańyraǵy» atty konferentsııa ótti

KÓKShETAÝ. QazAqparat - Kókshetaýda «Qazaq dalasy - uly túrki eliniń qara shańyraǵy» atty ǵylymı-praktıkalyq konferentsııa ótti, dep habarlaıdy QazAqparat tilshisi oblystyq ishki saıasat basqarmasyna silteme jasap.

Elbasynyń «Uly dalanyń jeti qyry» maqalasynda aıtylǵan «Qazaqstan - túrki áleminiń besigi» maqalasyndaǵy mindetterdi júzege asyrý aıasynda «Shańyraq» qoǵamdyq birlestiginiń uıymdastyrýymen ótken sharaǵa tarıhshylar, aǵartýshylar, qoǵam qaıratkerleri, memlekettik qyzmetkerler, úkimettik emes uıymdar, jastar jáne BAQ ókilderi qatysty.

Ǵylymı-praktıkalyq konferentsııada L.N.Gýmılev atyndaǵy Eýrazııa ulttyq ýnıversıteti halyqaralyq qatynastar fakýlteti túrkologııa kafedrasynyń professory, fılologııa ǵylymdarynyń doktory Shákir Ybyraev, ál-Farabı atyndaǵy Qazaq ulttyq ýnıversıtetiniń professory, tarıh ǵylymdarynyń doktory Vıktor Zaıbert, fılologııa ǵylymdarynyń doktory, Sh.Ýálıhanov atyndaǵy Kókshetaý memlekettik ýnıversıtetiniń qazaq fılologııa kafedrasynyń professory Shalabaı Berdibaı, tarıh ǵylymdarynyń doktory, professor, Tarıh jáne QR qoǵamdyq ǵylymdar akademııasynyń akademıgi Qadyrjan Ábýev baıandama jasady.

Elbasy Nursultan Nazarbaevtyń «Uly dalanyń jeti qyry» atty maqalasy jarııalanǵaly beri túrki álemin zertteý - qazaq memlekettiliginiń qalyptasý kezeńi retinde ǵana emes, sonymen birge, ulttyń rýhanı áleýetin qalyptastyrýdyń, mádenıettiń jáne ulttyq ıdeologııanyń odan ári damýynyń qaınar kózi retinde erekshe mánge ıe boldy.

«Aqmola oblysy ákimi joldaǵan quttyqtaý sózinde «Búgingi konferentsııa - túrkitaný salasyndaǵy bilimdi júıeleý jáne jańartý boıynsha ýaqtyly jáne mańyzy zor bastama» dep atap ótti», - deıdi Aqmola oblysy ishki saıasat basqarmasy bastyǵynyń orynbasary Sabyrhan Kenjebaev.

Aıta keteıik, búgingi tańda óńirde «Uly dalanyń jeti qyry» sheńberinde «Qazynaly qazba – ult qundylyǵy» jobasy aıasynda arheologııa boıynsha belsendi zertteýler, ólketaný boıynsha mańyzdy jumystar júrgizilip, jazýshylar men ólketanýshylar eńbekteriniń jaryq kórýine qoldaý kórsetildi. Tarıhshylardyń bastamasymen memlekettiligimizdiń qalyptasýy men damýyna úles qosqan tarıhı tulǵalar týraly beınerolıkter jaryq kórdi.

«Ǵasyrlar amanaty» kórmesin ótkizý jumystary (Aqmola oblysynyń aýdandarynda tarıhı-ólketaný materıaldary qorynan kórme uıymdastyrý) qolǵa alynyp otyr.

Sondaı-aq, ashyq aspan astyndaǵy «Botaı – Býrabaı» arheologııalyq jáne etnografııalyq murajaı jobasy da sátti júzege asyryldy.

Ǵylymı-praktıkalyq konferentsııa aıasynda tarıhshylar men fılologtarǵa arnalǵan sektsııalyq jumystar júrgizildi.