Kókshetaýda qaıyrymdylyq aýktsıonynan túsken 1,2 mln teńge naýqas úsh balaǵa bólinip berildi

KÓKShETAÝ. QazAqparat - Kókshetaýda Aqmola Assambleıasynyń qoldaýymen, Analar keńesiniń uıymdastyrýymen «Júrekten júrekke» atty qaıyrymdylyq aýktsıony ótti, dep habaralaıdy «QazAqparat» HAA-nań tilshisi.

Atalǵan sharaǵa Aqmola oblysy ákiminiń orynbasary Nurlan Nurkenov qatysty. QR Táýelsizdiginiń 25 jyldyǵyna oraı uıymdastyrylǵan respýblıkalyq jalpyulttyq «Qaıyrymdylyq kerýeni» aktsııasy aıasynda uıymdastyrylǵan qaıyrymdylyq aýktsıonynan túsken qarajat aýyr naýqasqa shaldyqqan balalardyń emdelýine jumsalmaq. Eraly Jumabek, Álıasqar Ámirjanov jáne Janel Beısenova sııaqty balalary aýyr naýqasqa shaldyqqan jandary jaraly ata-analar úshin mundaı qaıyrymdylyq sharasynyń máni zor.

Aýktsıon barysynda oblys ortalyǵynda balalar kórkemsýret mektebiniń, daryndy balalarǵa arnalǵan oqytý-ádistemelik ortalyǵynyń, kolledjderdiń oqýshylarynyń shyǵarmashylyq jumystary aýktsıonǵa qoıylyp, satyldy. Bul oraıda, eń kóp shyǵarmashylyq jumystardy satyp alǵan «Altyntaý-Kókshetaý» aktsıonerlik qoǵamy boldy. Sol sııaqty oblystyq basqarmalardyń mamandary da aýktsıonǵa qoıylǵan balalardyń shyǵarmalaryn satyp aldy.  

Atalǵan shara sońynda 1 201 575 teńge aqsha jınalyp, úsh balanyń ata-anasyna bólinip berildi.

«Júrekten júrekke» aýktsıonynyń sońynda Qazaqstan halqy Aqmola assambleıasynyń janyndaǵy Analar keńesiniń tóraıymy Zere Qıyqova qatysýshylarǵa aq alǵysyn bildirdi. Áli de joǵaryda atalǵan balalardyń shotyna aýdandardan, túrli mekemelerden qarajat túsedi dep kútilýde. 

Eske sala keteıik, byltyrǵy jyly uıymdastyrylǵan «Júrekten júrekke» qaıyrymdylyq aktsııasynda 3 jarym mıllıonnan teńgedeı qarjy jınalǵan bolatyn.