Kókshetaýda qaıtarylǵan aktıvter esebinen jańa sport kesheni salynyp jatyr

KÓKShETAÝ. KAZINFORM – Kókshetaýda kópfýnktsıonaldy sporttyq-mádenı keshenniń qurylysy aıaqtalýda.

Úkimet osy maqsattarǵa Arnaýly memlekettik qordan 12,6 mlrd teńge bóldi.

Sport kesheninde olımpıadalyq standarttyń sertıfıkattalǵan quraldarymen jabdyqtalǵan boks, kúres, aýyr atletıka jáne krossfıtke arnalǵan zaldar qarastyrylǵan, bul Kókshetaýda respýblıkalyq jáne álemdik deńgeıdegi IBA jarystaryn ótkizýge múmkindik beredi.

- Sport kesheniniń aýmaǵynda eki fýtbol alańy, ıadro men naıza laqtyrýǵa arnalǵan alań, oıyn jáne jattyǵý aımaqtary, ámbebap sport alańdary jáne jeńil atletıka aımaǵy ornalasatyn bolady. Halyqtyń mobıldiligi tómen toptary úshin arnaıy qural-jabdyqtar qarastyrylǵan, - delingen Úkimet taratqan aqparatta.

Budan bólek, órt-qoldanbaly sport túrlerine arnalǵan skalodrom jáne munarasy bar ámbebap sport zalyn ashý josparlanýda. Munda kásibı qutqarýshylardy daıarlaıtyn QR TJM Azamattyq qorǵaý akademııasynyń kýrsanttary ózderiniń kásibı daǵdylaryn arttyra alady.

Mádenı-buqaralyq is-sharalarǵa arnalǵan zamanaýı mýltımedııalyq júıeleri bar 650 oryndyq zal da qoljetimdi bolmaq.

Nysanda negizgi qurylys jumystary aıaqtaldy, ishki árleý, abattandyrý jáne ınjenerlik jeliler júrgizilýde. Nysannyń jalpy daıyndyǵy – 85%. Osy jyldyń sońyna deıin paıdalanýǵa berý josparlanǵan.

Bul jobany júzege asyrý oblys ortalyǵynyń turǵyndary úshin jyl boıy sport nysandarynyń qoljetimdiligi máselelerin sheshedi jáne azamattardyń barlyq sanattarynyń sportpen shuǵyldanýyna jáne salamatty ómir saltyn saqtaýǵa qatysýyn arttyrady.

Aıta keteıik, Jetisý oblysynda qaıtarylǵan aktıvter esebinen salynǵan segiz jańa medıtsınalyq nysan ashyldy.