Kókshetaýda qatty turmystyq qaldyqtardy óńdeıtin zaýyt salynbaqshy
KÓKShETAÝ. QazAqparat - Kókshetaýda qatty turmystyq qaldyqtardy óńdeıtin zaýyttyń qurylysy boıynsha kelisózder júrgizilýde. Bul týraly jýrnalıstermen ótken brıfıngte qala ákimi Baýyrjan Ǵaısa málim etti, dep habarlaıdy QazAqparat tilshisi.
Qala ákiminiń aıtýynsha, búgingi tańda jergilikti bılik aldynda qoqys shyǵarý tarıfin kóterý, jańa qatty turmystyq qaldyqtar polıgonyn ashý jáne qoqysty kádege jaratatyn zaýyt salý máselesi tur. Osy rette, qala basshysy qyrkúıektiń 29-da memlekettik organdar ókilderimen keńes ótip, onda osy másele talqylanǵanyn atap ótti.
«Kókshetaýda qatty turmystyq qaldyqtardy jınaý máselesi ózekti bolyp otyr. Tabıǵatty qorǵaý prokýrorynyń usynysy boıynsha kelistik, qazir biz jol kartasyn jasap jatyrmyz – qalaı bolý kerek jáne ne isteý kerek degen sııaqty. Óıtkeni, jańa qatty turmystyq qaldyqtar polıgonyn salý bir jylǵa sozylady, sodan keıin qoqysty óńdeıtin zaýyttyń qurylysyna taǵy eki jylǵa ketedi. Al, bul zaýytqa qoqys qory qajet. Sondyqtan, zaýyt salynatyn jerge qoqys tastaıyn ýaqytsha alań jasaý kerek. Osy boıynsha jumys istep jatyrmyz», - dedi Baýyrjan Ǵaısa.
Qoqysty qaıta óńdeý zaýytynyń qurylysy Krasnoıardaǵy qatty turmystyq qaldyqtar polıgonynyń janynda nemese Omby trassasy boıynsha josparlanyp otyr. Ákim atap ótkendeı, zaýyt qala ishinde salynbaıdy.
«Búgin biz koreı kompanııasymen kelissózder júrgizip jatyrmyz. Olar qoqysty jaǵý jáne elektr energııasyn óndirý boıynsha qoqys óńdeý zaýytyn salady degen ýaǵdalastyqqa qol jetkizildi. Eger bári jaqsy bolsa, kompanııa kelesi jyly tamyz-qyrkúıek aılarynda zaýyt salýdy josparlap otyr», - dedi ákim Ǵaısa.
Sondaı-aq, qala ákimi qoqys jınaýmen aılanysatyn kommýnaldyq kásiporyndardyń shyǵynǵa jumys istep jatqanyn atap ótti.
«Qazirgi ýaqytta kelisimshart boıynsha qalanyń turǵyn úı sektorynan qatty turmystyq qaldyqtardy shyǵarýmen «Kókshe Tazalyq» JShS jáne «EcoGroup 2020» JShS aınalysady. «Kókshe Tazalyq» JShS kásiporyndary qoldanystaǵy tarıf boıynsha 2012 jyldan bastap jumys isteıdi. Qazir kezde kásiporyn qoqys jınaýǵa jáne qatty turmystyq qaldyqtardy shyǵarýǵa arnalǵan 2500 konteınerdi, avtoparkti jańartýǵa múmkindigi joq. Tipti, tikeleı shyǵyndar men salyq tólemderin ótemeı almaı keledi», - dedi qala ákimi.
Aıta ketsek, «Kókshe Tazalyq» JShS búgingi kúni 109 300 abonentpen kelisim shart jasady, kásiporynda 73,3 mıllıon teńge debıtorlyq qaryzy bar. Al «EcoGroup 2020» JShS shaǵyn aýdandardyń turǵyndaryna qyzmet kórsetedi. «Sary Arqa», Krasnoıar jáne Chaıkıno kenterindegi 4 873 abonentpen sharttar jasady, bul rette onyń 12,1 mıllıon teńge debıtorlyq bereshek bar.
