Kókshetaýda kásipkerlerge kontrabandalyq temekini anyqtaý tásilderi úıretildi

NUR-SULTAN. QazAqparat - Kókshetaý qalasyndaǵy temeki satýshylaryna arnalǵan oqytý aqparattyq týry aıasynda tsıfrlyq tańbalaý júıesi jáne bızneske arnalǵan «Naqty Sauda Akt» mobıldi qosymshasyn paıdalaný boıynsha trenıng ótti, dep habarlaıdy MKK baspasóz qyzmeti.

Sharany Taýarlardy tsıfrlyq tańbalaý jáne qadaǵalaý jónindegi biryńǵaı operator Memlekettik kirister komıtetimen birlesip uıymdastyrdy.

Semınar-trenıngke temeki satýshylardyń 40-qa jýyq ókili qatysty. Іs-shara aıasynda tsıfrlyq tańbalaý jobasynyń keńsesiniń ókilderi Naqty Sauda Akt qosymshasymen jumys isteý boıynsha trenıng ótkizip, kásipkerler qosymshanyń jumysy jáne jalpy tsıfrlyq tańbalaý júıesi týraly suraqtarǵa jaýap aldy. Temeki ónimderiniń bólshek saýdasymen aınalysatyn qazaqstandyq kásipkerler úshin taǵy 17 qalada osyndaı tanymdyq sharalardy ótkizý josparlanýda.

«Barlyq temeki ónimderi arnaıy kod túrindegi sáıkestendirý quraldarymen tańbalanady. Sondaı-aq, 2022 jyldyń 1 qańtarynan bastap temeki ónimderin aktsızdik tańbalarmen tańbalaý alynyp tastaldy, osyǵan baılanysty Qazaqstan Respýblıkasyna tasymaldanaty barlyq temeki ónimderi tek sáıkestendirý quraldarymen tańbalanady», - dedi Aqmola oblysy boıynsha Memlekettik kirister departamentiniń aktsızderdi ákimshilendirý basqarmasynyń basshysy Erjan Shúlembekov.

EAEO elderinde, onyń ishinde Qazaqstanda tsıfrlyq tańbalaý Data Matrix eki ólshemdi kodynyń kómegimen júzege asyrylady. Kásipkerler ony ónimge qoldanady, al tutynýshylar ony arnaıy qosymshanyń kómegimen skanerleı alady. Sandyq tańbalaý ekojúıesinde ár túrli maqsatty aýdıtorııaǵa arnalǵan úsh mobıldi qosymsha bar:

* Naqty Onim - tutynýshylar úshin 2D-skanerdiń ornyna qyzmet etedi jáne tańbalanǵan taýar týraly barlyq aqparatty bilýge múmkindik beredi;

* Naqty Sauda Kassa - kásipker KBM operatsııalary týraly derekterdi FDO serverine jiberý jáne tańbalanǵan taýarlardy esepke alý júıesimen jumys isteý úshin qurylǵan;

* Naqty Sauda Akt - taýarlardy tańbalaý men qadaǵalaýdyń aqparattyq júıesinde (TTQ AJ) tańbalanǵan taýarlardy qabyldaý-tapsyrý aktilerin jasaýǵa jáne rastaýǵa arnalǵan.

Sońǵysy jetildirilip jańartyldy, oǵan «Avtomatty túrde júıeden shyǵý» fýnktsııasy qosyldy, sonymen qatar tehnıkalyq qoldaý suraýlaryn óńdeý ýaqyty qysqartyldy.

2022 jyldyń 13 shildesinde tsıfrlyq tańbalaý temeki ónimderin sáıkestendirý úshin buryn qoldanylǵan aktsızdik markanyń fýnktsııasyn tolyǵymen almastyrdy. Endi tsıfrlyq tańbalaý kodynsyz temeki ónimderiniń aınalymy úshin josyqsyz kásipkerlerge taýardy tárkilep jáne lıtsenzııadan aıyryp aıyppul salynady.

2022 jyldyń basynan beri QR aýmaǵyna kontrabandalyq jolmen satý úshin ákelingen 22,5 mln qorap temeki ónimderi anyqtalyp, tárkilendi. 2022 jyldyń shildesinen bastap Qazaqstanda dárilik preparattardy tsıfrlyq tańbalaý engizilýde.

Temeki ónimderin tańbalaý erejelerimen myna jerde tanysýǵa bolady. Suraqtar týyndaǵan jaǵdaıda, kásipkerler táýlik boıy jumys isteıtin baılanys ortalyǵyna 8 800 080 6565 nómiri boıynsha habarlasa alady

Foto: epha.org