Kókshetaýda kásipkerden aqsha talap etken tótenshe jaǵdaı qyzmetkerleri sottaldy

KÓKShETAÝ. QazAqparat - Aqmola oblysynda tótenshe jaǵdaılar basqarmasynyń qyzmetkerleri alaıaqtyq úshin sottaldy, dep habarlaıdy QazAqparat tilshisi oblystyq sottyń baspasóz qyzmetine silteme jasap.

Kókshetaý qalalyq sotynyń úkimimen Kókshetaý qalasy tótenshe jaǵdaılar basqarmasynyń qyzmetkerleri T. jáne K. alaıaqtyq jasaýǵa oqtalǵany úshin sottalyp, ómir boıyna memqyzmette jumys isteý quqyǵynan aıyryldy.

Árqaısysyna 3 000 000 teńge aıyppul salyndy.

Oǵan qosa, kináliler aǵa leıtenant jáne azamattyq qorǵanys kapıtany arnaıy ataǵynan aıyryldy.

«TJ basqarmasynyń aǵa ınjenerleri T. jáne K. qolynda tıisti materıaldary bolmasa da, qoqys órtengende oqıǵa ornyna barmaı, JShS basshysyna ákimshilik jazanyń aıyppul somasynyń jartysyn olarǵa bergen jaǵdaıda jaýapkershilikten qutylýdy usynǵan. JShS basshysy qyzmetkerlerdiń áreketi zańsyz ekenin túsinip, sybaılas jemqorlyqqa qarsy qyzmetke júgindi. Nátıjesinde olar 200 000 teńge somasynda aqsha alǵan kezde ustaldy. Osylaısha T. jáne K. aýyr dárejede alaıaqtyq jasady (QK 24-babynyń 3-bóligi, 190-babynyń 3-bóligi)», - dedi vedomstvodan.

Aqmola oblystyq sotynyń baspasóz qyzmetinen atap ótkendeı, sottalǵandar kinásin moıyndap, istegen isine ókingen.

Olardyń kinási kýágerlerdiń, jábirlenýshiniń aıǵaqtarymen, jasyryn tergeý áreketteriniń materıaldarymen, sot saraptamalarynyń qorytyndylarymen rastaldy.

«Jábirlenýshige keltirilgen zalal tolyq óteldi.Úkim zańdy kúshine engen joq», - dep tolyqtyrdy vedomstvodan.

Aıta ketsek, kúni keshe Kókshetaý polıtsııa basqarmasy bastyǵynyń orynbasary da alaıaqtyq úshin sottalǵan edi.