Kókshetaýda «qaraqshylyq shabýyldan» zardap shekken dúken ákimshisi isti boldy
KÓKShETAÝ. QazAqparat- Kókshetaýda polıtsııaǵa qaraqshylyq shabýyl týraly jalǵan málimet bergen «StroıMart» saýda úıiniń ákimshisiniń qylyǵy áshkerelendi, dep habarlaıdy QazAqparat tilshisi.
ІІD baspasóz qyzmetiniń málimeti boıynsha 15 qańtar kúni saǵat 21:30-darda Kókshetaý qalalyq ІІB-ine saýda úıine qaraqshylyq shabýyl jasalǵany týraly aqparat túsken. Zardap shegýshi, saýda úıiniń ákimshisi 25 jastaǵy jigittiń sózinshe, beıtanys eki adam dúkenge basa-kóktep kirip, onyń aıaǵyn pyshaqpen jaralaǵan, sondaı-aq, dúkendegi aqshany alyp, izin sýytqan.
Oqıǵa ornyna dereý jetken jedel izdestirý toby, polıtsııa qyzmetkerleri beınebaqylaý kamerasyndaǵy jazbany tekserip, zardap shekken adamnan túsinikteme aldy. Kúdiktini izdeýge qalalyq ІІB jeke quramy tartyldy.
Osyǵan baılanysty QR QK 192-babynyń 2-bóligi boıynsha sotaldy óndiristik is qozǵaldy.
Tergeý amaldary barysynda saýda úıiniń ákimshisi «qaraqshylyq shabýyl» týraly polıtsııaǵa jalǵan habar bergeni anyqtaldy. Keıin belgili bolǵandaı kúndiz er adam dúkenniń seıfinde jatqan 1 954 000 teńgeni alyp, Kókshetaý qalasyndaǵy býkmekerlik keńsede utylyp qalǵan. Sol sebepti, aqshanyń ornyn toltyrý úshin óziniń eki sybaılasymen birlesip, «qaraqshylyq shabýyldy» uıymdastyrady.
Alaıda, polıtsııa onyń aramza oıyn áshkerlep, kerisinshe ústinen QR QK 189-babynyń 3-bóligi (ózine senip tapsyrǵan bireýdiń múlkin ıemdený jáne jumsaý) jáne 419-baby (jalǵan málimet berý) boıynsha is qozǵady. Kúdikti ýaqytsha ustaý oqshaýlaǵyshyna toǵytyldy. Tergeý amaldary jalǵasýda.
